ეუთო/ოდირი ოცნების ხელისუფლებისგან თანხმობას ელოდება, რათა სასამართლო პროცესების მონიტორინგი დაიწყოს. ინფორმაცია ორგანიზაციამ "ფორმულას" დაუდასტურა.

აღნიშნული მექანიზმის ამოქმედების ინიციატივით ეუთო/ოდირმა ოცნების ხელისუფლებას წლის დასაწყისში მიმართა, თუმცა პასუხი ამ დრომდე არ მიუღია.

"სასამართლო პროცესების მონიტორინგი მნიშვნელოვანი ინსტრუმენტია სამართლიანი სასამართლო პროცესის უფლების პატივისცემის სანდო და ობიექტური შეფასების უზრუნველსაყოფად. თუმცა, ასეთი მონიტორინგის განხორციელება მოითხოვს ყველა შესაბამისი ეროვნული ორგანოს თანხმობას და თანამშრომლობას, ODIHR-ის მეთოდოლოგიის შესაბამისად.

ჩვენ ვაგრძელებთ დიალოგს ეუთოში საქართველოს დელეგაციასთან, რათა დავადასტუროთ საჭირო თანამშრომლობა და უზრუნველყოთ ეს და სხვა შესაბამისი დახმარება. ODIHR მზადაა, ჩაატაროს სასამართლო პროცესების მონიტორინგი საქართველოში ჩვენი კარგად დამკვიდრებული მონიტორინგის მეთოდოლოგიის შესაბამისად და ეს მზადყოფნა გამოხატულ იქნა საქართველოს ხელისუფლებისთვის 2025 წლის იანვრიდან.

ჩვენ ვაგრძელებთ საქართველოს და ეუთოს რეგიონის ყველა სახელმწიფოს დახმარებას დემოკრატიისა და კანონის უზენაესობის მიმართ ეუთოს წინაშე აღებული ვალდებულებების შესრულებაში" — განუცხადა ეუთო/ოდირმა "ფორმულას".

21 ივლისს, იურისტმა გიორგი ბურჯანაძემ სოციალურ ქსელში დაწერა, რომ "პოლიტიკური პატიმრების საქმეებზე ოცნება ეუთო/ოდირს მონიტორინგის განხორციელებისთვის საჭირო თანხმობას არ აძლევს".

"2013 წელს, ოცნებამ თვითონ მოიწვია ეუთო ოდირი პროცესების მონიტორინგისთვის და საინტერესოა, თუ მაშინ არ ჰქონდათ რამე დასამალი, დღეს რა აქვთ?" — აღნიშნავს იურისტი.