ოცნების საპარლამენტო უმრავლესობის ლიდერი მამუკა მდინარაძე სოციალურ ქსელში განცხადებას აქვეყნებს და ევროპარლამენტის განცხადებას ეხმაურება.

"შარშან გვეუბნებოდნენ, ევროკავშირში გაწევრიანების პროცესზე უარი თქვენ თქვითო და პროტესტს ამით კვებავდნენ. "ირკვევა", თურმე "ავტორიტარული მმართველობის" ბრალი ყოფილა და სასწრაფოდ კურსი უნდა შევცვალოთ.
ახლა ყველაფერი გასაგებია.

რა არის ამისთვის საჭირო?

1. დღევანდელი მმართველობის ფორმა უნდა შევცვალოთ და ისეთი უზრუნველვყოთ, როგორც ეს სააკაშვილს ჰქონდა. "დემოკრატიის შუქურა" ასე უხეშად არ უნდა ჩაგვექრო და უნდა გამოვასწოროთ. პრინციპში ჩვენ გაგვიჭირდება, აგენტებმა უკეთესად იციან ეს როგორ დაალაგონ და "სამართლიანი არჩევნებიც" მათ მმართველობაში მოყვანას გულისხმობს.

2. უნდა შევიდეთ დსთ-ში და ეკონომიკის განვითარებაც მოლდოვასნაირი უნდა გვქონდეს.

3. უნდა ვიყოთ ისეთივე ურთიერთობაში რუსეთთან, როგორც უკრაინა — ღია ომში.

4. ოჯახურ ღირებულებებზე და მსგავს "ქართულ-ეროვნულ ახირებებზე" უარი რომ უნდა ვთქვათ, ეს პრინციპში პირდაპირ მოგვწერეს რამდენიმე დღის წინ.

აი ამ შემთხვევაში ევროპარლამენტის განცხადება იქნება აბსოლუტურად განსხვავებული, მეტიც პოზიტიური და მხარდამჭერი.

მხოლოდ ვიზალიბერალიზაციით შანტაჟი, როგორც ჩანს, არ ჭრის, დამატებითი ზომებია საჭირო ქართველი ხალხის წინააღმდეგ, რომელსაც საკუთარ თავზე უარი არასდროს უთქვამს — ყველას მოუწევს ამასთან შეგუება!

პ. ს. დღეს რადიკალებს აქცია აქვთ დაანონსებული, რომელიც ორკვირიანი მზადების მიუხედავად ფაქტობრივად ჩავარდნილი იყო და მის "დასაბუსტად" რაღაც იყო საჭირო. რა საოცარი დამთხვევაა ეს განცხადება", — დაწერა მამუკა მდინარაძემ.

ცნობისთვის, დღეს ევროპარლამენტმა განცხადება გაავრცელა, სადაც ოცნების მთავრობას აკრიტიკებს და აღნიშნავს, რომ თუ ისინი ავტორიტარულ კურსს არ შეიცვლიან, მაშინ საქართველო ევროკავშირში გაწევრიანებას ვერ შეძლებს.

იხილეთ ასევე:

ევროპარლამენტი: საქართველო ევროკავშირში გაწევრიანებას მანამ ვერ შეძლებს, სანამ მისი მთავრობა ავტორიტარულ კურსს არ შეცვლის