საბერძნეთში მედიასაშუალებები ერთი დღით გაიფიცნენ, წერს ადგილობრივი მედია. 26 სექტემბერს დილის ექვსი საათიდან 27 სექტემბრის დილის ექვს საათამდე ტელევიზიებსა და რადიოში არ გავა საინფორმაციო გამოშვება, ასევე არ იმუშავებენ საინფორმაციო ვებგვერდები. ოთხშაბათ დღეს კი, არ გამოვა ბეჭდური მედია. გაფიცვის ორგანიზატორია ჟურნალისტთა გაერთიანება ESIEA.

ორგანიზატორების თქმით, გაფიცული მედიასაშუალების წარმომადგენლები სოციალური დაზღვევის სისტემის შენარჩუნებასა და მედიასაშუალებების თანამშრომლების შრომითი და სოციალური უფლებების დარღვევის შეწყვეტას ითხოვენ.

2017 წლის მაისში ჟურნალისტები მეზღვაურებთან ერთად გაიფიცნენ. მათ ეკონომიკის მძიმე პირობები გააპროტესტეს. მაშინაც, გაფიცვა სამშაბათ დღეს 24 საათით მოეწყო.