2025 წლის 10 ივლისს, ნიდერლანდებმა უკრაინის 2025–2026 წლების აღდგენისა და ეკონომიკური გაჯანსაღებისათვის 300 მილიონი ევრო გამოყო. მხარდაჭერა უკრაინის აღდგენის კონფერენციაზე (URC) რომში გამოცხადდა, სადაც ნიდერლანდების საგარეო საქმეთა მინისტრი კასპარ ველდკამპი და პრემიერმინისტრი დიკ სხოფი მონაწილეობდნენ. ამის შესახებ ინფორმაციას ნიდერლანდების მთავრობა ოფიციალურ ვებგვერდზე ავრცელებს.

300 მილიონიდან 30 მილიონი ევრო მიმართული იქნება ჰოლანდიური კომპანიებისა და ორგანიზაციების დასახმარებლად Ukraine Partnership Facility (UPF) გრანტის პროგრამის ფარგლებში. 52 მილიონი ევრო დაიხარჯება უკრაინის ენერგოინფრასტრუქტურისა და სასმელი წყლის სისტემების აღდგენაზე 2025 წელს. დამატებით 4 მილიონი ევრო ლვოვის ბავშვთა საავადმყოფოს ახალი ფრთის ასაშენებლად გამოიყოფა.

ეს თანხები ნიდერლანდების მიერ არამილიტარული დახმარების პაკეტს ეკუთვნის, რომელიც წლიურად 252 მილიონ ევროს შეადგენს და ჯამში 500 მილიონს აჭარბებს.

მინისტრმა ველდკამპმა აღნიშნა, რომ რუსეთი მხოლოდ უკრაინის შეიარაღებულ ძალებს კი არა, არამედ საზოგადოებასა და ეკონომიკასაც ანადგურებს.

"რუსეთი მხოლოდ უკრაინის შეიარაღებული ძალების დაჩოქებას არ ცდილობს — იგი უკვე სამი წელია, სისტემურად ანადგურებს უკრაინის საზოგადოებასა და ეკონომიკას მუდმივი შეტევებით, მათ შორის ენერგოინფრასტრუქტურაზე, წყლის მარაგებზე, მარცვლეულის საცავებზე, საცხოვრებელ სახლებსა და ბინებზე.

სწორედ ამიტომ არის მნიშვნელოვანი, რომ საერთაშორისო საზოგადოებამ უკრაინას არა მხოლოდ იარაღით, არამედ ფინანსური, ეკონომიკური და სოციალური დახმარებითაც დაუჭიროს მხარი. აუცილებელია უკრაინის ეკონომიკამ და საზოგადოებამ ფუნქციონირება გააგრძელოს — ეს დაეხმარება ქვეყანას საკუთარ ბრძოლაში. ეს ერთგვარი დამატებითი ფრონტია. ჩვენი ფინანსური და ეკონომიკური მხარდაჭერა ასევე მიმართულია იმაზე, რომ აღდგენის პროცესი შეუფერხებლად წარიმართოს და რეკონსტრუქციის ხარჯები შემცირდეს", — განაცხადა ნიდერლანდების საგარეო საქმეთა მინისტრმა.

კონფერენციაზე ველდკამპი და უკრაინის პირველი ვიცეპრემიერი იულია სვირიდენკო ხელს მოაწერენ შეთანხმებას UPF პროგრამის გაგრძელებაზე, რომელიც აგრო-სასურსათო სექტორს, განახლებად ენერგიას, ჯანდაცვას, წყალსა და ცირკულარული მშენებლობის პროექტებს შეეხება.

გარდა ამისა, ნიდერლანდებმა დაადასტურა 20 მილიონი ევროს (წლიურად 10 მილიონი 2025 და 2026 წლებში) უკრაინის კიბერ უსაფრთხოების გასაძლიერებლად გამოყოფა. აღნიშნული მხარდაჭერა მიზნად რუსული კიბერშეტევებისგან კრიტიკული სექტორების დაცვას ისახავს.