ოთხშაბათს, ირანის პრეზიდენტმა, მასუდ ფეზეშქიანმა მიიღო კანონი, რომლითაც ირანმა საერთაშორისო ატომური ენერგიის სააგენტოსთან (IAEA) თანამშრომლობა შეაჩერა.

CNN წერს, რომ გაურკვეველია, როდის ამოქმედდება ახალი კანონი, თუმცა ამ გადაწყვეტილებამ შესაძლოა ირანს გზა გაუხსნას, აღადგინოს თავისი ბირთვული პროგრამა ატომური ენერგიის სააგენტოს ზედამხედველობისა და მონიტორინგის გარეშე.

ირანი IAEA-ს ადანაშაულებს ისრაელთან ერთად თანამშრომლობაში და ასევე იმაში, რომ ატომური ენერგიის საერთაშორისო სააგენტო ისრაელს აწვდის ინფორმაციას ბირთვული ობიექტების მდებარეობის შესახებ. ამ ბრალდებას სააგენტო უარყოფს.

CNN-ის ცნობით, კვირას, IAEA-მ განაცხადა, რომ აშშ-ის იერიშებმა ირანის ბირთვული საწარმოების სრული დაზიანება ვერ შეძლო და თეირანს შეუძლია ურანის რაოდენობის გაზრდა რამდენიმე თვეში აღადგინოს.

სახელმწიფო საინფორმაციო სააგენტო IRNA-ს ცნობით, პეზეშკიანმა ირანის ატომური ენერგიის ორგანიზაციას, ეროვნული უსაფრთხოების უმაღლეს საბჭოს და საგარეო საქმეთა სამინისტროს კანონის აღსრულება დაავალა.

აშშ-ის სახელმწიფო დეპარტამენტმა ირანის გადაწყვეტილებას "მიუღებელი" უწოდა და თეირანს "სრულფასოვანი თანამშრომლობისკენ" მოუწოდა. სახდეპის პრესსპიკერმა ტემი ბრიუსმა განაცხადა, რომ ეს იმ დროს მოხდა, როდესაც ირანს "აქვს შესაძლებლობა, შეცვალოს კურსი და აირჩიოს მშვიდობისა და კეთილდღეობის გზა".

გერმანიის განცხადებით, ფეზეშქიანის ნაბიჯი "კატასტროფული სიგნალია".

"დიპლომატიური გამოსავალისთვის მნიშვნელოვანია ირანმა იმუშაოს IAEA-სთან ერთად". განუცხადა გერმანიის საგარეო საქმეთა სამინისტროს პრესსპიკერმა, მარტინ გიზემ, — იუწყება AFP.

გაეროს გენერალური მდივნის პრესსპიკერმა სტეფან დიუჟარიკმა ოთხშაბათს გამართულ ბრიფინგზე ირანის გადაწყვეტილებას "შემაშფოთებელი" უწოდა. მან გაეროს გენერალური მდივნის, ანტონიო გუტერეშის მოსაზრება გაიმეორა და მოუწოდა ირანს, ითანამშრომლოს IAEA-სთან.

წინა თვეს ისრაელმა ირანზე მოულოდნელი შეტევა განახორციელა, რომელიც მიმართული იყო მისი სამხედრო მეთაურების, ბირთვული ობიექტებისა და იმ მეცნიერების წინააღმდეგ, ვინც მუშაობს ირანის ატომურ პროგრამაზე. მომდევნო კვირას აშშ-მ ისრაელის მხარდასაჭერად საჰაერო შეტევა განახორციელა 3 ირანულ ბირთვულ საწარმოებზე. 12-დღიანი კონფლიქტი ირანსა და ისრაელს შორის ცეცხლის შეწყვეტით დამთავრდა.

ბოლო თავდასხმების შედეგად ირანის ბირთვული ობიექტები სერიოზულად დაზიანდა, თუმცა თეირანი აცხადებს, რომ განაგრძობს ურანის გამდიდრებას "მშვიდობიანი" ბირთვული პროგრამისთვის. IAEA-ს განცხადებით, აშშ-ის იერიშებმა ვერ შეძლო მათი ბირთვული პროგრამის სრულ დაზიანებას და ირანს შეუძლია ურანით გამდიდრება გააგრძელოს რამდენიმე თვეში.

ასევე იხილეთ: