საქართველოს პარლამენტის თავმჯდომარე დავით უსუფაშვილი მიიჩნევს, რომ მნიშვნელოვანია კოალიცია ქართული ოცნება იყოს ერთიანი და ნაკლები მნიშვნელობა აქვს, თუ რომელი პარტია რა ადგილს დაიკავებს სიაში. ამის შესახებ უსუფაშვილმა დღეს, 7 მარტს, პარლამენტში, აკრედიტებული მედიასაშუალებების წარმომადგენლებთან შეხვედრაზე განაცხადა:

"კოალიციაში ყველა პარტნიორს თავისი როლი და დანიშნულება აქვს. ცნობილი ფორმულაა, რომ მილიონს ერთი თუ აკლია, მილიონი არ არისო. ანუ, ერთიანობაზე უნდა ვისაუბროთ, აქ ყველას თავისი ძალიან ღირსეული ადგილი და ფუნქცია აკისრია.

მე მიყვარს რესპუბლიკური პარტია და პირველ ადგილზე ვაყენებ მას, მაგრამ კოალიციურ ერთობაში პირველი იქნება, მეორე იქნება, ერთ-ნახევარი იქნება, ამაზე, რა თქმა უნდა, იქნება მსჯელობა. არ არის მართალი ის, რომ რესპუბლიკურ პარტიას რაღაც განსაკუთრებული წარმოდგენები აქვს საკუთარ თავზე, მაგრამ არც ის არის მართალი, რომ არა აქვს წარმოდგენები საკუთარ თავზე".

მმართველ კოალიციის წევრებს შორის დაპირისპირებამ პიკს რამდენიმე დღის წინ მიაღწია. პრემიერმინისტრმა გიორგი კვირიკაშვილმა დაპირისპირებული მხარეები გააკრიტიკა, განსაკუთრებული აქცენტი კი თავდაცვის მინისტრ თინა ხიდაშელის როლზე გააკეთა. მან გუნდში შესაძლო ცვლილებებიც დააანონსა, რის შემდეგაც რესპუბლიკელები კვირიკაშვილს შეხვდნენ. შეხვედრის შემდეგ ცნობილი გახდა, რომ რესპუბლიკური პარტია რჩება კოალიციაში და არჩევნებში მონაწილეობას ქართულ ოცნებასთან ერთად მიიღებს.