16 ივნისის ღამეს, ირანმა ისრაელის ცენტრალურ ნაწილზე რაკეტების ახალი ტალღა გაუშვა, რის გამოც მთელ ქვეყანაში, მათ შორის თელ-ავივსა და იერუსალიმში, საჰაერო განგაშისა და თავდაცვის სისტემები ჩაირთო. რამდენიმე საცხოვრებელი შენობა დაზიანდა, აფეთქებები დაფიქსირდა ნავთობგადამამუშავებელ ქარხანასთან ქალაქ ჰაიფაში. ასევე დაზიანდა ელექტროგადამცემი ქსელი ცენტრალურ ისრაელში.

ირანულმა მედიამ გაავრცელა ინფორმაცია, რომ კვირის დასაწყისში ირანმა "ასობით" რაკეტა გაუშვა ისრაელისკენ, რომლებიც საცხოვრებელ შენობებსა და ინფრასტრუქტურას დაუმიზნა. მომხდარის შესახებ ინფორმაციას CNN ავრცელებს

ღამის იერიშების შედეგად ისრაელში დაიღუპა სულ მცირე ხუთი ადამიანი, რაც მიმდინარე კონფლიქტის დაწყებიდან დაღუპულთა რაოდენობა 19-მდე ზრდის. ირანში, ირანის ოფიციალური უწყებებისა და სახელმწიფო მედიასაშუალებების ცნობით, დაიღუპა მინიმუმ 224 ადამიანი და 1,277 ადამიანი ჰოსპიტალიზებულია — უმეტესად მშვიდობიანი მოქალაქეები.

ისრაელის არმიამ განაცხადა, რომ მათი გამანადგურებლები ქუდსის ძალების (ირანის რევოლუციური გვარდიის საიდუმლო დაჯგუფება) სარდლობის ცენტრებს დაესხნენ თავს. კვირას ისრაელმა ირანში რაკეტების ბაზები და სამხედრო ობიექტები დაბომბა, რის შედეგადაც რევოლუციური გვარდიის სადაზვერვო ხელმძღვანელი დაიღუპა.

CNN-ის ცნობით, ორი ამერიკელი ოფიციალური პირი ამბობს, რომ პრეზიდენტმა ტრამპმა ისრაელის გეგმა ირანის უმაღლესი ლიდერის, აიათოლა ალი ხამენეის, ლიკვიდაციის შესახებ უარყო. ისრაელის პრემიერმინისტრმა, ბენიამინ ნეთანიაჰუმაც ასეთი გეგმის არსებობა მკაცრად უარყო. ტრამპმა ასევე აღნიშნა, რომ ის ელის შეთანხმებას ისრაელსა და ირანს შორის და მიიჩნევს, რომ ამის "კარგი შანსი არსებობს", თუმცა აღნიშნა, ისიც რომ "ხანდახან საჭიროა საქმე ბრძოლით მოაგვარონ."

ირანმა და ისრაელმა მოუწოდეს ერთმანეთს, რომ უსაფრთხოების მიზნით მოსახლეობა სტრატეგიული სამხედრო ობიექტების სიახლოვიდან გაიყვანონ.

ახლო აღმოსავლეთში დაძაბულობის უპრეცედენტო გამწვავების ფონზე, ისრაელმა პარასკევს, გამთენიისას, მასშტაბური სამხედრო იერიში მიიტანა ირანის ბირთვულ და სამხედრო ობიექტებზე. საჰაერო შეტევები, რომელიც ირანის წინააღმდეგ განხორციელებული ყველაზე ინტენსიური იერიში იყო ისრაელის თანამედროვე ისტორიაში, ძირითადად მიმართული იყო ბირთვულ ობიექტებზე, სარაკეტო ბაზებსა და ირანის უმაღლეს სამხედრო ხელმძღვანელობაზე.