ამერიკის შეერთებული შტატების სააპელაციო სასამართლომ ფედერალური მოსამართლის გადაწყვეტილება, რომელიც დონალდ ტრამპის ადმინისტრაციას ავალდებულებდა, კალიფორნიის ეროვნული გვარდიის კონტროლი სახელმწიფოსთვის დაებრუნებინა, დროებით დაბლოკა. ეს გადაწყვეტილება მოსამართლე ჩარლზ ბრაიერის განცხადებას მოჰყვა, რომლის თქმითაც ტრამპის მიერ ეროვნული გვარდიის გაგზავნა ლოს-ანჯელესში, პროტესტების დასაშოშმინებლად, არაკანონიერი იყო.

ამერიკის შეერთებული შტატების პრეზიდენტმა, დონალდ ტრამპმა განაცხადა, რომ გვარდიის გაგზავნა საჭირო იყო, რათა ლოს-ანჯელესი "არ ჩამწვარიყო". თუმცა კალიფორნიის გუბერნატორმა გევინ ნიუსომმა და სხვა ადგილობრივმა ხელმძღვანელებმა ეს ნაბიჯი პროვოკაციად შეაფასეს. მიუხედავად ამისა, ტრამპმა ეროვნული გვარდიის 4,000 ჯარისკაცი და 700 საზღვაო ქვეითი გაგზავნა, რომელთაგან ზოგს უფლება ჰქონდა დროებით დაეკავებინა პირები, სანამ პოლიცია მივიდოდა.

მოსამართლე ბრაიერმა დაასკვნა, რომ ტრამპმა ამ გადაწყვეტილებით ფედერალური კანონი დაარღვია, როდესაც გვარდია ფედერალურ კონტროლში გუბერნატორის გვერდის ავლით გადაიყვანა და შესაბამისად, კარებზე კონტროლი შტატისთვის უნდა დაებრუნებინა.

აშშ-ის სააპელაციო სასამართლოს განცხადებით, აღნიშნულ საქმეზე მოსმენა სამშაბათს გაიმართება.

ცნობისთვის, ეს პროცესები 6 ივნისს დაიწყო, როდესაც აშშ-ის იმიგრაციისა და საბაჟო აღსრულების სამსახურმა (ICE) ლოს-ანჯელესში ფართომასშტაბიანი რეიდები ჩაატარა. მექსიკის საგარეო საქმეთა მინისტრის, ხუან რამონ დე ლა ფუენტეს განცხადებით, სულ მცირე 42 მექსიკელი დააკავეს, უმეტესობა — სამუშაო ადგილზე. აღნიშნულმა ქმედებამ მძაფრი პროტესტი გამოიწვია მიგრანტთა თემებსა და სამოქალაქო აქტივისტებში.