ევროპარლამენტის ყოფილი დეპუტატი და იტალიელი ჟურნალისტი ჯულიეტო კიეზა ევროპარლამნეტში სახმრეთ ოსეთის დე-ფაქტო პრეზიდენტის, ანატოლი ბიბილოვის სიტყვით გამოსვლის ორგანიზებას გეგმავს.

როგორც Sputnik წერს, კიეზა ცხინვალში იტალიის დელეგაციასთან ერთად ჩამოვიდა და ამატრიჩეში წინა წლის აგვისტოში მიწისძვრის შედეგად დაღუპულთა ხსოვნისადმი მიძღვნილ საღამოს მოაწყობენ.

კიეზას თქმით, მან მიიღო ოფიციალური განკარგულება, რომლის მიხედვითაც უფლებამოსილია ევროპარლამენტში ე.წ. სამხრეთ ოსეთის ინტერესები დაიცვას:

"ამ ორგანიზაციაში არამხოლოდ არ აღიარებენ ამ რესპუბლიკას, არამედ არც კი იციან რაზე მიდის საუბარი... როდესაც დეპუტატი ვიყავი, ჩემმა კოლეგებმა არამხოლოდ სამხრეთ ოსეთის შესახებ არ იცოდნენ, მათ არ იცოდნენ ისტორია, გარემოებები და მიზეზები, რომელმაც ეს სიტუაცია შექმნა."

ყოფილმა ევროპარლამენტარმა Sputnik-თან განაცხადა, რომ ის გააკეთებს ყველაფერს, რათა სამხრეთ ოსეთის დე-ფაქტო რესპუბლიკის შესახებ მეტმა ადამიანმა გაიგოს, ამისთვის კი იტალიაში კულტურულ და პოლიტიკურ ღონისძიებებს მოაწყობს.

იტალიელი ჟურნალისტი და პოლიტიკოსი ჯილიეტო კიეზა ევროპარლამენტის დეპუტატი 2004 წელს გახდა და საერთაშორისო ვაჭრობის კომიტეტის ვიცე-პრეზიდენტი იყო. ევროპარლამენტში ყოფნის დროს ის რუსეთისადმი კეთილგანწყობით გამოირჩეოდა და 2008 წლის აგვისტოს ომის შემდეგ, მალევე ოკუპირებულ ტერიტორიაზეც იმყოფებოდა.