"თანაინვესტირების ფონდის" ყოფილი ხელმძღვანელის, გიორგი ბაჩიაშვილის ადვოკატები მისი "გატაცების" საქმეზე გამოძიების დაწყებას ითხოვენ.

ინტერპრესნიუსის ცნობით, ამ მოთხოვნით ადვოკატები გენერალურ პროკურატურას დღეს, ელექტრონული წესით მიმართავენ. ამის შესახებ მათ გლდანის მე-8 დაწესებულებაში მყოფ გიორგი ბაჩიაშვილთან ისაუბრეს.

"სამუშაო შეხვედრა გვქონდა, საბოლოოდ დავაზუსტეთ განცხადების შინაარსი, რომლითაც პროკურატურას ონლაინ დღესვე მივამართავთ, რაც გამოძიების დაწყების მოთხოვნას უკავშირდება. ფაქტებთან ერთად მოთხოვნა გვექნება, რომ გარკვეული საგამოძიებო მოქმედებები დაუყოვნებლივ ჩატარდეს. მათ შორის, ეს იქნება გარკვეული ტიპის ინფორმაციის გამოთხოვის მოთხოვნა - სარადარო ინფორმაცია, სადისპეტჩერო ჩანაწერები, ასევე აეროპორტისა და ბორტის ვიდეოკამერების ჩანაწერები", — განუცხადა ჯანდიერმა IPN-ს.