პარტია სახალხო კრების ყოფილმა წევრმა, მოჭადრაკე ნონა გაფრინდაშვილმა თეა წულუკიანის კომისიის სხდომაზე 2011 წლის 26 მაისის აქციის დაშლა 1989 წლის 9 აპრილს შეადარა.

მისი თქმით, 26 მაისისგან განსხვავებით, 9 აპრილს ხალხს "გასაქცევი ჰქონდა".

"ჩვენ რაც 26 მაისს გადავიტანეთ, წინასწარ იყო მოფიქრებული, ეს იყო დაგეგმილი ოპერაცია. ჩვენი დასჯა უნდოდათ იქ სერიოზულად. მე მაგას სასაკლაოს ვუწოდებ, იმიტომ რომ, რაც იქ მოხდა, ამას ვერავინ წარმოიდგენდა. ბევრი აქცია ჩატარებულა.

9 აპრილიდან რომ დავიწყოთ, შემდეგ რა აქციებიც ტარდებოდა, მსგავსი არც ერთ აქციაზე არ ყოფილა. ჩაკეტილი იყო. სამი კორდონი იყო ჩვენს ირგვლივ იმ დღეს, გასასვლელიც არ იყო დატოვებული, ჩაკეტილი იყო. 9 აპრილი იმიტომ ვახსენე, ის საშინელება, რომ ხალხს გასაქცევი ჰქონდათ. კი მისდევდნენ იმ ადამიანებს, მაგრამ გასაქცევი ჰქონდათ, აქ [26 მაისს] არ ჰქონდათ", — თქვა ნონა გაფრინდაშვილმა.

შეგახსენებთ, რომ 2011 წლის მაისში, პრეზიდენტ მიხეილ სააკაშვილის გადადგომის მოთხოვნით, ოპოზიციური პოლიტიკური პარტია სახალხო კრების მიერ ორგანიზებული საპროტესტო გამოსვლები თბილისსა და ბათუმში 21 მაისიდან 26 მაისის ჩათვლით მიმდინარეობდა და თბილისში სამართალდამცავი ორგანოების მხრიდან მისი დარბევით დასრულდა. 26 მაისის აქციის დაშლისას დაშავდა რამდენიმე ათეული ადამიანი, აქედან 28 სამოქალაქო პირი და ერთი ჟურნალისტი, დაიღუპა 2 მოქალაქე.