MEGOBARI აქტს, კანონპროექტს, სახელწოდებით — "საქართველოს ანგარიშვალდებულების, გამძლეობისა და დამოუკიდებლობის შესაძლებლობების გაძლიერებისა და მობილიზაციის აქტი" მხარი 349 კონგრესმენმა დაუჭირა, რაც კანონპროექტის 80%-იანი მხარდაჭერაა. მის წინააღმდეგ ხმა 42-მა კონგრესმენმა მისცა.

ამერიკელმა კონგრესმენმა, ჯო უილსონმა X-ზე დაწერა: "MEGOBARI აქტი წარმომადგენელთა პალატამ მიიღო" და ფოტო გამოაქვეყნა, სადაც კანონპროექტის ხმის მიცემის შედეგებია ასახული.

წარმომადგენელთა პალატის შემდეგ, სანამ კანონპროექტი ხელმოსაწერად პრეზიდენტ დონალდ ტრამპამდე მიაღწევს, ის სენატმაც უნდა დაამტკიცოს.

კანონპროექტის ამოქმედებამდე რამდენიმე ეტაპია დარჩენილი:

აშშ-ს წარმომადგენელთა პალატაში MEGOBARI აქტის მიღების შემდეგ, კანონპროექტი სენატმაც უნდა მიიღოს. აშშ-ს სენატში კანონპროექტს გავლილი აქვს საგარეო კომიტეტი და ამის შემდეგ ის კენჭისყრის ეტაპზე გადავიდა.

"თუკი ორივე პალატაში კანონპროექტის ზუსტად ერთსა და იმავე ვერსიას მიიღებენ, მაშინ MEGOBARI აქტი შემდეგ ეტაპზე გადავა, თუმცა თუკი წარმომადგენელთა პალატა ან სენატი საკუთარ ვერსიაში შესწორებას შეიტანს, ამ შემთხვევაში საჭირო გახდება, რომ შესწორებული ვერსია კონგრესის მეორე პალატამაც მიიღოს;

წარმომადგენელთა პალატასა და სენატში MEGOBARI აქტის საერთო ვერსიის დამტკიცების შემდეგ მას აშშ-ს პრეზიდენტს გადაუგზავნიან. პრეზიდენტის მხრიდან ხელმოწერის შემთხვევაში, აქტი ძალაში შევა. თუ პრეზიდენტი არაფერს მოიმოქმედებს, მაშინ აქტი 10 დღეში ავტომატურად შევა ძალაში, თუკი კონგრესი ამ პერიოდში მუშაობას გააგრძელებს. ხოლო პრეზიდენტის მხრიდან აქტზე ვეტოს დადების შემთხვევაში, კონგრესს ორივე პალატაში ხმების ორი-მესამედი დასჭირდება ვეტოს დასაძლევად", — წერს ტაბულა.

წარმომადგენელთა პალატაში კენჭისყრას წინ უსწრებდა დებატები "MEGOBARI აქტის" შესახებ. სიტყვით გამოვიდა ხუთი კანონმდებელი, სამი რესპუბლიკელი და ორი დემოკრატი: რესპუბლიკელები — ბრაიან მასტი (პალატის საგარეო ურთიერთობათა კომიტეტის თავმჯდომარე), ჯო უილსონი და უორენ დევიდსონი და დემოკრატები ჯონი ოშესკი და სტივ კოენი. აქედან ოთხმა მხარი დაუჭირა "MEGOBARI აქტის" მიღებას, ერთი, რესპუბლიკელი უორენ დევიდსონი წინააღმდეგი იყო.

ბრაიან მასტის თქმით, საქართველო-აშშ-ის მრავალწლიანი ორმხრივი ურთიერთობა შეირყა მმართველი პარტიის ქმედებების გამო, "რომელიც იმეორებს რუსეთის ავტორიტარულ ტაქტიკას, ასევე ჩინეთთან და ირანთან დაახლოებით".

„"ის მოკავშირე იყო, განსაკუთრებით 2008 წელს რუსეთის მიერ საქართველოში შეჭრის შემდეგ. აშშ სარგებლობდა სამხედრო და დაზვერვის სფეროში თანამშრომლობით და საქართველოს მოსახლეობა თავისი პროამერიკული განწყობებით ცნობილია. საქართველოსთან ჩვენი ორმხრივი ურთიერთობა შეარყია მმართველი ქართული ოცნების პარტიის ქმედებებმა, რომელიც იმეორებს რუსეთის ავტორიტარულ ტაქტიკას, ასევე ჩინეთთან და ირანთან დაახლოებით. პროდასავლური დემოკრატიული საქართველოს მიერ შემოთავაზებული შესაძლებლობები აშკარაა. საქართველოს შავ ზღვაზე მდებარეობის გამო, ის შუა დერეფნის გავლით ვაჭრობისთვის საკვანძო ადგილს წარმოადგენს და შეიძლება რეგიონში ირანისა და რუსეთის გავლენის გამაწონასწორებელ ძალად იქცეს", — თქვა ბრაიან მასტმა.

მისივე თქმით, "როგორც კი პრეზიდენტი დაადასტურებს, რომ საქართველო დაუბრუნდა თავის პროდასავლურ კურსს, კანონპროექტი ითვალისწინებს ხალხთა შორის კავშირების გაძლიერებას".

"ეს კანონპროექტი საქართველოს ალტერნატივას სთავაზობს. როგორც კი პრეზიდენტი დაადასტურებს, რომ საქართველო დაუბრუნდა თავის პროდასავლურ კურსს, კანონპროექტი ითვალისწინებს ხალხთა შორის კავშირების გაძლიერებას, სამხედრო თანამშრომლობასა და ხელს შეუწყობს ორმხრივი ურთიერთობების გაუმჯობესებას. ამერიკის შეერთებულმა შტატებმა პარტნიორები კარგი საქციელისთვის უნდა დააჯილდოოს. ეს კანონპროექტი ქართველ ხალხზე თავდასხმას არ წარმოადგენს", — აღნიშნა კონგრესმენმა.