ეგვიპტელი გამომძიებლების ინფორმაციით, ხმელთაშუა ზღვის ფსკერზე, 3 კილომეტრის სიღრმეზე, ეგვიპტის ავიახაზების Airbus a320-ის ნამსხვრევებს მიაგნეს. ინფორმაციას ამის შესახებ BBC ავრცელებს.

სამგზავრო თვითმფრინავი, რომელიც 2016 წლის 19 მაისს პარიზი-კაიროს რეისს ასრულებდა, დაშვებამდე 20 წუთით ადრე, ხმელთაშუა ზღვის თავზე გაუჩინარდა. საბერძნეთის ხელისუფლების თქმით, მათმა სამხედრო რადარმა დააფიქსირა, თვითმფრინავის ჯერ მარცხნივ, შემდეგ კი 360 გრადუსით მარჯვნივ მობრუნება, 11 კილომეტრის სიმაღლიდან კი ვარდნა დაიწყო, დაახლოებით 4.5 კილომეტრის სიმაღლეზე კი რადარებიდან გაუჩინარდა.

თვითმფრინავის ბორტზე სულ 66 ადამიანი იმყოფებოდა.

ჯერჯერობით, უცნობია, რა გახდა თვითმფრინავის ჩამოვარდნის მიზეზი, არ გამოირიცხება ტერორისტული აქტიც, თუმცა, მომხდარზე პასუხისმგებლობა ამ დრომდე არცერთ ტერორისტულ ორგანიზაციას არ აუღია.

სპეციალისტები ვარაუდობენ, რომ საქმე, შესაძლოა, ეხებოდეს თვითმფრინავის გაუმართაობას, რადგან ჩამოვარდნამდე რამდენიმე წუთით ადრე, თვითმფრინავის ელექტრონულმა სისტემამ სატელიტზე გაგზავნა პილოტების კაბინაში ტემპერატურის მატებისა და კვამლის აღმოჩენის სიგნალი, თუმცა, მიზეზი რა იყო, ე.წ. შავი ყუთების აღმოჩენამდე, უცნობი რჩება.

რაც შეეხება ე.წ. შავ ყუთებს, რომლებიც იწერენ თვითმფრინავში ნებისმიერ აუდიო აქტივობას და ასევე, ტექნიკურ მონაცემებს, ჯერჯერობით, ნაპოვნი არ არის. რამდენიმე დღის წინ ძებნაში ჩართულმა ხომალდმა დააფქსირა ერთ–ერთი შავი ყუთიდან მომავალი სიგნალი. სპეციალისტებს ე.წ. შავი ყუთების საპოვნელად 24 ივნისამდე აქვთ დრო, რადგან ამ დღის მერე, მოწყობილობა ზღვის ფსკერიდან ავტომატური სიგნალის გამოგზავნას შეწყვეტს და მისი აღმოჩენა უფრო გართულდება. შესაბამისად, გართულდება კატასტროფის მიზეზის ზუსტად დადგენა.