2028 წელსაც ქართული ოცნება გაიმარჯვებს და შემდეგ არჩევნებშიც, — ამის შესახებ ქალაქის მერმა, კახა კალაძემ ჟურნალისტებს უთხრა.

რაც შეეხება ვიზალიბერალიზაციას, მისი თქმით, პასუხისმგებლობა ეკისრება იმ ზოგიერთ ევროპელ გაზულუქებულ ბიუროკრატს, რომელიც ქართველ ხალხს შანტაჟის ენით ელაპარაკება.

"მთელი პასუხისმგებლობა ეკისრება იმ ზოგიერთ ევროპელ გაზულუქებულ, კორუმპირებულ ბიუროკრატს, რომლებიც შანტაჟის ენით ესაუბრებიან ქართველ ხალხს, ქართულ სახელმწიფოს. ჩვენ ამის შესაძლებლობას არავის მივცემთ. გინდ ევროინტეგრაციის საკითხით გვაშანტაჟონ, გინდაც პირადად, საქართველოს ინტერესები არ დაითმობა. ჩვენ მსგავსი რეზოლუცია ბევრი გვინახავს, შანტაჟიც ბევრი გვახსოვს. ჯერ კანდიდატის სტატუსის თემით გვაშანტაჟებდნენ, შემდეგ მოლაპარაკებების გახსნის თემით, ახლა კი, ვიზალიბერალიზაციისა და ასოცირების შეთანხმების საკითხს იყენებენ.

თუ ვინმეს სურვილი აქვს ნახოს, რა აქვს საქართველოს ევროინტეგრაციის მიმართულებით გაკეთებული. დარწმუნდებიან, რომ მოწინავე ქვეყანა ვართ. წინგადადგმული ნაბიჯებით და ნაკისრი ვალდებულებების შესრულებით იმ ქვეყნებზე წინ ვართ, რომლებმაც კანდიდატის სტატუსი ჩვენზე ადრე მოიპოვეს. აქ სხვა მოცემულობაა — საქართველოსთან მიმართებით სხვა დამოკიდებულება აქვთ. ევროპელი ბიუროკრატები, რადიკალურ დაჯგუფებებთან ერთად, დამარცხდნენ არჩევნებში, ქართველმა ხალხმა მათ უთხრა არა. სწორედ ეს აგიჟებთ და ამიტომ გვაშანტაჟებენ", — აღნიშნა კალაძემ.

კახა კალაძე: ვიზალიბერალიზაცია კი არა, საქართველოს ინტერესია მთავარი, დამოუკიდებლობა და სუვერენიტეტი