ორშაბათს ღაზას სექტორზე ისრაელის მიერ მიტანილ მომდევნო იერიშს ორი ჟურნალისტი ემსხვერპლა —ჰოსამ შაბატი და მოჰამად მანსური.

ჰოსამ შაბატი 23 წლის ჟურნალისტი იყო, რომელიც ალ ჯაზირასთვის მუშაობდა და ღაზას სექტორში მიმდინარე მოვლენებს აშუქებდა. თვითმხილველების თქმით, მისი მანქანა გაფრთხილების გარეშე ამოიღეს მიზანში ჩრდილოეთ ღაზაში, ბეით ლაჰიას აღმოსავლეთ მხარეს.

ალ ჯაზირას კიდევ ერთი ჟურნალისტი, თარექ აბუ აზუმი ამბობს, რომ შაბატი ისრაელის წინა შეტევის შემდეგ უკვე დაშავებული იყო, თუმცა კონფლიქტური ზონიდან ახალი ამბების გაშუქებას მაინც აგრძელებდა.

შაბატი გასული 18 თვის განმავლობაში უწყვეტად მუშაობდა ალ ჯაზირასთვის და ოჯახთან ერთად ევაკუაციაზეც უარი თქვა. ჟურნალისტმა იცოდა, რომ მისი სიცოცხლე მუდმივი რისკის ქვეშ იყო, ამიტომ წერილი დაწერა, რომლის გამოქვეყნებაც თავის თანამშრომლებს სთხოვა იმ შემთხვევაში, თუ ისრაელის თავდაცვის ძალების თავდასხმას შეეწირებოდა.

გთავაზობთ მისი წერილის თარგმანს:

"თუ ამას კითხულობთ, ეს იმას ნიშნავს, რომ ისრაელის ოკუპაციურმა ძალებმა — დიდი ალბათობით, დამიზნებით — მომკლეს. როცა ეს ყველაფერი დაიწყო, 21 წლის ვიყავი — უნივერსიტეტის სტუდენტი, რომელსაც, ყველას მსგავსად, ოცნებები ჰქონდა. უკანასკნელი 18 თვის განმავლობაში, ჩემი ცხოვრების თითოეული მომენტი ჩემს ხალხს მივუძღვენი. ჩრდილოეთ ღაზაში მიმდინარე საშინელებები ავსახე, რათა მსოფლიოსთვის ის სიმართლე მეჩვენებინა, რომლის დამარხვასაც ცდილობდნენ. მეძინა ტროტუარებზე, სკოლებში, კარვებში — ყველგან, სადაც შემეძლო. ყოველი დღე გადარჩენისთვის ბრძოლა იყო. თვეობით მიწევდა შიმშილობა, თუმცა ჩემი ხალხი არასდროს მიმიტოვებია.

ღმერთს ვფიცავ, ჟურნალისტის ვალდებულებები შევასრულე. ყველაფერი გავიღე სიმართლის გასავრცელებლად და ახლა, საბოლოოდ, დავისვენებ — ეს ბოლო 18 თვეა, არ გამომიცდია. ეს ყველაფერი იმიტომ გავაკეთე, რომ პალესტინის მიზნის მჯერა. მწამს, რომ ეს მიწა ჩვენია, მისი დაცვისთვის სიკვდილი ჩემი ცხოვრების ყველაზე დიდი პატივია.

ახლა კი თქვენ გთხოვთ: არ შეწყვიტოთ ღაზაზე საუბარი. არ მისცეთ მსოფლიოს გვერდით გახედვის უფლება. განაგრძეთ ბრძოლა, განაგრძეთ ჩვენი ამბების მოყოლა იქამდე, სანამ პალესტინა თავისუფალი არ იქნება."

ალ ჯაზირას ცნობით, ოქტომბრის შემდეგ ისრაელის თავდაცვის ძალების თავდასხმებს 230-ზე მეტი ჟურნალისტი ემსხვერპლა. აქედან 5 ცხელი წერტილიდან ალ ჯაზირასთვის მუშაობდა.