დონალდ ტრამპი გამოეხმაურა ცნობებს იმის შესახებ, რომ მარტში ირანი, რუსეთი და ჩინეთი ინდოეთის ოკეანეში ერთობლივ საზღვაო-სამხედრო წვრთნებს ჩაატარებენ. Fox News-ის ჟურნალისტს აღნიშნულ საკითხთან დაკავშირებით კითხვაზე აშშ-ის პრეზიდენტმა უპასუხა, რომ ამ ცნობებზე საერთოდ არ ღელავს.

"ჩვენ უფრო ძლიერები ვართ, ვიდრე ყველა მათგანი. ჩვენ გვაქვს უფრო დიდი ძალა, ვიდრე თითოეულ მათგანს", — განაცხადა დონალდ ტრამპმა.

მიუხედავად ამისა, ვაშინგტონში ირანის, ჩინეთის, რუსეთისა და ჩრდილოეთ კორეის დაახლობით გამოწვეული შეშფოთება იზრდება. ამერიკელმა კანონმდებლებმა აღნიშნულ ალიანსს "ავტოკრატების ღერძიც" კი უწოდეს.

გასულ წელს რუსეთისა და ჩრდილოეთ კორეის თანამშრომლობა ახალ ეტაპზე ავიდა, როცა ორმა ავტორიტარულმა სახელმწიფომ ურთიერთთავდაცვის ხელშეკრულება გააფორმა.