იუსტიციის სამინისტრო მოძრაობა სოციალური დემოკრატიისთვის რეგისტრაციაზე უარს ამბობს.

მოძრაობა სოციალური დემოკრატიისთვის ფეისბუქ-პოსტში ვკითხულობთ, რომ იუსტიციის სამინისტროსგან რეგისტრაციის უარყოფის მიზეზები არ მიუღიათ. პოსტში ასევე ვკითხულობთ, რომ ისინი ფუნქციონირებას ვერ შეძლებს თუ ის იურიდიულად დარეგისტრირებული არ იქნება.

"იუსტიციის სამინისტრო ჩვენს რეგისტრაციაზე უარს ამბობს. არც მიზეზს გვეუბნება და არც ერთ პროცედურას არ იცავს.

მოძრაობის სრულფასოვნად ფუნქციონირებისთვის, მოძრაობას სჭირდება ოფიციალური ფორმა, რის გამოც გადავწყვიტეთ, იურიდიულ პირად დავრეგისტრირებულიყავით. 21 თებერვალს ამ მოთხოვნით მივმართეთ იუსტიციის სამინისტროს იურიდიულ პირთა რეესტრს. უწყებამ ჩვენს მიერ წარდგენილ დოკუმენტებში ხარვეზი იპოვა და მომდევნო დღეს გვაცნობა ამის შესახებ. ჩვენ ეს ხარვეზი უმოკლეს ვადაში, 25 თებერვალს აღმოვფხვერით.
კანონი სამინისტროს ავალდებულებს, რომ ერთი დღის ვადაში (26 თებერვლის ბოლომდე) დავერეგისტრირებინეთ. თუმცა დღეს 6 მარტია და მათგან ჯერაც არაფერი ისმის.
27, 28 თებერვალს, 4 და 6 მარტს იუსტიციის სამინისტროს ცხელ ხაზზე დავრეკეთ და ვაცნობეთ ამ კანონდარღვევის შესახებ, თუმცა უშედეგოდ.
ამ თვითნებობით ჩვენი მოძრაობა ფერხდება. ამას აღვიქვამთ როგორც ჩვენს საქმიანობაში ჩარევას და ხელის შეშლას," — განაცხადა მოძრაობამ.

ცნობისთვის, 17 თებერვალს, თბილისში მოძრაობა სოციალური დემოკრატიისთვის დაფუძნდა, ის სხვადასხვა პროფესიის, გამოცდილებისა და ინტერესების მქონე მოქალაქეებს აერთიანებს, რომელთაც სჯერათ, რომ საქართველოს გადარჩენისა და განვითარების ერთადერთი სწორი გზა სოციალური დემოკრატიაა.

"ავტორიტარიზმის გაძლიერების, შიშისა და დაბნეულობის ფონზე, მოძრაობისთვის მნიშვნელოვანია დემოკრატიაზე, სამართლიანობაზე, თანასწორობასა და უკეთეს პოლიტიკურ და ეკონომიკურ სისტემაზე ღიად და უკომპრომისოდ საუბარი. მოძრაობა ამის მიღწევას არგუმენტების თანმიმდევრული გავრცელებით, ახალი წევრების მიღებით, პროტესტის მუხტის გაძლიერებითა და ახალი აქტივობების წამოწყებით გეგმავს", — აცხადებენ დამფუძნებლები.

ასევე იხილეთ: