აშშ-ს პრეზიდენტმა, დონალდ ტრამპის კონგრესში სიტყვით გამოსვლისას განაცხადა, რომ უკრაინის პრეზიდენტმა, ვოლოდიმირ ზელენსკისგან მნიშვნელოვანი წერილი მიიღო, სადაც ნათქვამია, რომ კიევი მზადაა, მოლაპარაკების მაგიდასთან რაც შეიძლება მალე დაჯდეს.

"დღეს მივიღე მნიშვნელოვანი წერილი უკრაინის პრეზიდენტ ზელენსკისგან. უკრაინა მზადაა მოლაპარაკებების მაგიდასთან რაც შეიძლება მალე დაჯდეს, რათა მივუახლოვდეთ გრძელვადიანი მშვიდობას", — თქვა ტრამპმა.

მისივე თქმით, ზელენსკიმ ასევე განაცხადა, რომ მზადაა ხელი მოაწეროს შეთანხმებას წიაღისეულის მოპოვებაზე "ნებისმიერ ხელსაყრელ დროს" და არავის უნდა მშვიდობა უკრაინელებზე მეტად.

ტრამპმა თქვა, რომ მადლიერია წერილისთვის და დასძინა: "ამავდროულად, ჩვენ გვქონდა სერიოზული მოლაპარაკებები რუსეთთან და მივიღეთ ძლიერი სიგნალები, რომ ისინი მზად არიან მშვიდობისთვის".

ვოლოდიმირ ზელენსკიმ 4 მარტს სოციალურ ქსელში პოსტი გამოაქვეყნა სადაც მზადყოფნას გამოთქვა, იმუშაოს აშშ-ის პრეზიდენტ დონალდ ტრამპთან ერთად მშვიდობის მისაღწევად.

ამას გარდა, ზელენსკი მადლობას უხდის ამერიკის შეერთებულ შტატებს და სინანულს გამოთქვამს 28 თებერვალს თეთრი სახლის ოვალურ კაბინეტში მომხდარი ინციდენტის გამო. ზელენსკი წერს, რომ თეთრ სახლში შეხვედრა, "ისე არ წარიმართა, როგორც საჭირო იყო. საწყენია, რომ ეს მოხდა. საჭიროა ყველაფერი სწორად ვქნათ".

"არც ერთ ჩვენგანს არ სურს დაუსრულებელი ომი. უკრაინა მზად არის, რაც შეიძლება სწრაფად დაჯდეს მოლაპარაკებების მაგიდასთან იმისთვის, რომ დავაჩქაროთ ხანგრძლივი მშვიდობის მიღწევა. არავის სურს მშვიდობა უკრაინელ ხალხზე მეტად. მე ჩემს გუნდთან ერთად მზად ვარ, ვიმუშაო პრეზიდენტ ტრამპის მძლავრი ლიდერობით ხანგრძლივი მშვიდობის მისაღწევად.

ჩვენ მზად ვართ, ვიმუშაოთ სწრაფად ომის დასასრულებლად, რის თავდაპირველ ეტაპადაც, შესაძლოა, ტყვეთა გათავისუფლება იქცეს — ასევე, სასწრაფო დაზავება ცაში: რაკეტების, შორი მანძილების დრონების, ენერგეტიკული და სამოქალაქო ინფრასტრუქტურის დაბომბვების აკრძალვა — ასევე, დაუყოვნებლივ დაზავება ზღვაში, თუ ამას რუსეთიც იზამს. ჩვენ გვსურს, ძალიან სწრაფად გავიაროთ ყველა შემდეგი ეტაპი აშშ-სთან ერთად და მივიდეთ მყარ და საბოლოო შეთანხმებამდე.

ჩვენ ნამდვილად ვაფასებთ, რაც ამერიკამ გააკეთა უკრაინის სუვერენიტეტისა და დამოუკიდებლობის შესანარჩუნებლად და გვახსოვს ის გარდამტეხი მომენტი, როცა პრეზიდენტმა ტრამპმა უკრაინას გადასცა ჯაველინები. ჩვენ ამისთვის მადლიერები ვართ.

ჩვენი შეხვედრა ვაშინგტონში, თეთრ სახლში, ისე არ წარიმართა, როგორც საჭირო იყო. საწყენია, რომ ეს მოხდა. საჭიროა ყველაფერი სწორად ვქნათ. ჩვენ ვისურვებდით, რომ მომავალში თანამშრომლობა და ურთიერთობა იყოს კონსტრუქციული.

რაც შეეხება შეთანხმებას მინერალებსა და უსაფრთხოებაზე, უკრაინა მზად არის მას ხელი მოაწეროს ნებისმიერ დროს, ნებისმიერ სასურველ ფორმატში. ჩვენ ამ შეთანხმებას განვიხილავთ უსაფრთხოების განმტკიცებისა და უსაფრთხოების საიმედო გარანტიებისკენ გადადგმულ ნაბიჯად და იმედი გვაქვს, რომ ის ეფექტიანად იმუშავებს", — წერს ვოლოდიმირ ზელენსკი X-ზე.