3 მარტს, ხულოს რაიონში, სოფელ საციხურში კულტურული მემკვიდრეობის სტატუსის მქონე მეჩეთი დაიწვა.

სამუფთოს ინტერნეტ ტელევიზია საქართველოს მუსლიმთა სამმართველოს მიერ გავრცელებულ განცხადებას ავრცელებს, სადაც წერია, რომ სრულიად საქართველოს მუსლიმთა სამმართველო ღრმა მწუხარებას გამოთქვამს ხულოს მუნიციპალიტეტის სოფელ საციხურში, ხანძრის შედეგად, მეჩეთის დაწვის გამო.

"მეჩეთი მხოლოდ სალოცავი ადგილი არ არის. იგი ჩვენთვის სულიერი სიმტკიცის, ერთიანობისა და განათლების კერაა.

ეს მძიმე დანაკარგი გულს გვტკენს, თუმცა გვწამს, რომ მეჩეთი მხოლოდ კედლებისგან არ შედგება. ის ცოცხლობს მორწმუნეთა გულებში, სადაც ღვთისადმი რწმენა და ერთგულება სუფევს.

ვლოცულობთ, რომ უზენაესმა ალაჰმა მოგვმადლოს ძალა და შესაძლებლობა, რათა სულ მალე აღვადგინოთ იგი და კვლავ განაგრძოს "ჯემაღ'ეთმა" ღვთისმსახურება მშვიდ და უსაფრთხო გარემოში.

მოვუწოდებთ ყველა მორწმუნეს, ილოცონ ამ განსაცდელის სწრაფი გადალახვისთვის და გვერდში დაუდგნენ ჩვენს ძმებსა და დებს, რათა სულ მალე ავაგოთ ახალი მეჩეთი", — ნათქვამია სრულიად საქართველოს მუსლიმთა სამმართველოს ადმინისტრაციის მიერ გავრცელებულ ინფორმაციაში.

საციხურის ხის მეჩეთს 2006 წლის 7 ნოემბერს ეროვნული მნიშვნელობის კატეგორიის კულტურული უძრავი ძეგლის სტატუსი მიენიჭა. მეჩეთს ჰქონდა ქართული კულტურული მემკვიდრეობისთვის დამახასიათებელი ხის ჩუქურთმები, ხეზე კვეთის ნიმუშები, გამორჩეული ორნამენტები და უნიკალური კაკლის კარი.

როგორც ეთნოლოგები ამბობენ, ძეგლი ლაზი ოსტატების მიერ უნდა ყოფილიყო შესრულებული.