უკრაინის პრეზიდენტმა ვოლოდიმირ ზელენსკიმ განაცხადა, რომ ის კვლავ მზადაა განიხილოს წიაღისეულის შესახებ შეთანხმება კიევსა და ვაშინგტონს შორის და სურს შეერთებულ შტატებთან "კონსტრუქციული დიალოგი".

BBC-ის ეთერში ჟურნალისტის კითხვაზე, არის თუ არა მზად, უკან დაბრუნდეს თეთრ სახლში და ხელახლა განიხილონ სასარგებლო წიაღისეულის შეთანხმების დეტალები ტრამპთან, უკრაინის პრეზიდენტმა თქვა:

"მე საცდელად არ მოვსულვარ. მე მატარებლით 12 საათი ვიმგზავრე, შემდგომ 11 საათით ვიფრინე, რადგან აშშ-ს პრეზიდენტმა მიმიწვია და ეს ჩვენი ერთ-ერთი მთავარი პარტნიორია. ჩემთვის პატივია, ვიყო თეთრ სახლში, როდესაც პრეზიდენტისგან მოწვევას ვიღებ".

2 მარტს ლონდონში ევროპელი ლიდერების სამიტის შემდეგ საუბრისას, ზელენსკიმ განაცხადა, რომ ვაშინგტონში მისი ბოლო შეხვედრის გარემოებას არ მოუტანია სარგებელი არც შეერთებულ შტატებისთვის და არც უკრაინისთვის, როგორც პარტნიორებისთვის, ის მხოლოდ რუსეთის პრეზიდენტ ვლადიმერ პუტინისთვის იყო სარგებლიანი. ამასთან, უკრაინის ლიდერმა განაცხადა, რომ მიწვევის შემთხვევაში თეთრ სახლში დაბრუნდება.

"მე უბრალოდ მინდა, რომ უკრაინის პოზიცია მოისმინონ. ჩვენ გვინდა, რომ ჩვენმა პარტნიორებმა დაიმახსოვრონ, ვინ არის აგრესორი ამ ომში", — განაცხადა უკრაინის სახელმწიფოს მეთაურმა.

ზელენსკიმ ჟურნალისტებთან ბრიტანეთის დედაქალაქში მოლაპარაკებების შემდეგ ისაუბრა, რომლის დროსაც ევროპელი ლიდერები უკრაინასთან ურთიერთქმედების ოთხპუნქტიან გეგმაზე შეთანხმდნენ, რათა შეაჩერონ ომი და დაიცვან კიევი მომავალი რუსული აგრესიისგან.

აშშ-ს ფინანსთა მინისტრი: გარიგება ახლა მაგიდაზე არ არის

DW წერს, რომ ამის პარალელურად, აშშ-ს სახაზინო მდივანმა სკოტ ბესენტმა CBS News-სთან განაცხადა, რომ იშვიათი წიაღისეულის შესახებ შეთანხმება "ამჟამად მაგიდაზე არ არის".

"ვფიქრობ, უნდა ვნახოთ, სურს თუ არა პრეზიდენტ ზელენსკის გაგრძელება [სამშვიდობო მოლაპარაკების]. რა აზრი აქვს ეკონომიკურ შეთანხმებას, რომელსაც განხორციელება არ უწერია, თუ მას სურს ბრძოლა გაგრძელდეს. პრეზიდენტ ტრამპს სურს სამშვიდობო შეთანხმება", — თქვა ბესენტმა.

მისივე თქმით, "პრეზიდენტ ზელენსკის ყველაფერი უნდა გაეკეთებინა, მოსულიყო და ხელი მოეწერა ამ ეკონომიკურ შეთანხმებაზე" და მან "გადაწყვიტა მისი ჩაშლა".