ერთიანმა ნაციონალურმა მოძრაობამ ქუთაისის მერობის კანდიდატად საქართველოს საგარეო საქმეთა ყოფილი მინისტრი, გრიგოლ ვაშაძე წარადგინა.

კანდიდატის ოფიციალური წარდგენა ქუთაისში პარლამენტის შენობის წინ შედგა. ვაშაძის თქმით, ის ბოლომდე იბრძოლებს იმისათვის, რომ პარლამენტი დარჩეს ქუთაისში და პრეზიდენტი და სამინისტროების უმრავლესობაც ქუთაისში გადმოვიდეს:

"ეს არ იქნება მარტივი საარჩევნო კამპანია, ჩვენ მოწინააღმდეგეს აქვს შეუზღუდავი ფინანსური და ადმინისტრაციული რესურსი და ღია და ფარული სატელიტების მთელი ჯოგი. მათი მოქმედებები არჩევნებამდე ცხადყოფს, რომ ხელისუფლებას აქვს გაყალბების სურვილი და მზადყოფნა. ჩვენ არ გვეშინია, ჩვენ არ გავაყალბებინებთ და არ მოვაპარინებთ არცერთ ხმას. ჩვენი მთავარი იარაღი არის ის, რაც ყოველთვის იყო ნაციონალური მოძრაობის იარაღი, - სიმართლე, პატიოსნება, ერთმანეთის ერთგულება, პასუხისმგებლობა, ცოდნა და პროფესიონალიზმი და დაუღალავი შრომა ქვეყნის საკეთილდღეოდ."

გრიგოლ ვაშაძე იყო საქართველოს საგარეო საქმეთა მინისტრი 2008 წლის 6 დეკემბრიდან 2012 წლის 25 ოქტომბრამდე. 2008 წლის 2 ნოემბრიდან 6 დეკემბრამდე კი კულტურისა, ძეგლთა დაცვისა და სპორტის მინისტრის თანამდებობას იკავებდა.