დღეს, 24 თებერვალს უკრაინაში რუსეთის სრულმასშტაბიანი შეჭრის სამი წლის თავზე მსოფლიოს ლიდერები უკრაინას და უკრაინელ ხალხს მხარდაჭერას უცხადებენ.

კიევში რუსეთის სრულმასშტაბიანი შეჭრის მესამე წლისთავზე ევროკომისიის ხელმძღვანელი ურსულა ფონ დერ ლაიენი და ევროსაბჭოს პრეზიდენტი ანტონიო კოშტა უკრაინის პარტნიორების სამიტზე ჩავიდნენ.

ურსულა ფონ დერ ლაიენმა X-ზე დაწერა, რომ "რუსეთის სასტიკი შემოჭრის მე-3 წლისთავზე ევროპა კიევშია".

"ჩვენ დღეს კიევში ვართ, რადგან უკრაინა ევროპაა.

გადარჩენისთვის ბრძოლაში მხოლოდ უკრაინის ბედი არ არის სასწორზე.

ეს არის ევროპის ბედი", — წერს ფონ დერლაიენი.

საქართველოს მე-5 პრეზიდენტი, სალომე ზურაბიშვილი წერს, რომ ქართველი ხალხი პატივს სცემს უკრაინელების სიმამაცეს და გამძლეობას და მხნეობას უსურვებს.

"საკუთარი ქვეყნის, საკუთარი თავისუფლებისა და ჩვენი საერთო მომავლის დაცვის მესამე წელს ქართველი ხალხი უკრაინელი ხალხის სოლიდარულია. პატივს ვცემთ თქვენ სიმამაცესა და გამძლეობას. მხნეობას გისურვებთ" — წერს ზურაბიშვილი X-ზე.

მოლდოვის პრეზიდენტი, მაია სანდუ წერს, რომ უკრაინამ მოლდოვა ომისგან დაიცვა და ამას მოლდოველები არასოდეს დაივიწყებენ.

"ომის სამი წელი. მსხვერპლის სამი წელი. გამბედაობის სამი წელი.

უკრაინამ დაიცვა მოლდოვა ომის საშინელებისგან. ჩვენ არასოდეს დავივიწყებთ. ჩვენი გული, ჩვენი სახლები და ჩვენი მხარდაჭერა რჩება უკრაინელ ხალხს", — წერს მაია სანდუ.

რუსეთის უკრაინაში შეჭრის სამი წლის თავზე, გერმანიის არჩევნებში გამარჯვებული „ქრისტიან-დემოკრატიული კავშირი/ქრისტიან-სოციალური კავშირის“ ლიდერი, ფრიდრიხ მერცი წერს, რომ “ევროპა უკრაინის გვერდით მტკიცედ რჩება და უკრაინა უნდა გავაძლიეროთ”.

„უკრაინის წინააღმდეგ რუსული აგრესიული ომის სამი წელი, ევროპაში ომის სამი წელი - სამი წლის განმავლობაში ჩვენ თან გვდევს ომის დანაშაულებისა და დანაშაულების საზარელი კადრები. ევროპა უკრაინის გვერდით მტკიცედ რჩება. ახლა ისე, როგორც არასდროს, ჩვენ უკრაინა უნდა გავაძლიეროთ. სამართლიანი მშვიდობისთვის თავდასხმის მსხვერპლი ქვეყანა უნდა იყოს სამშვიდობო მოლაპარაკებების ნაწილი", — წერს მერცი.

შეგახსენებთ, რომ 24 თებერვალს უკრაინის პარტნიორების სამიტს 13 ქვეყნის ლიდერი, მათ შორის ჩრდილოეთ ევროპის ქვეყნების ლიდერები, დაესწრებიან, კიდევ 24 ლიდერი კი სამიტში მონაწილეობას ვიდეოჩართვის საშუალებით მიიღებს.