აშშ-ის პრეზიდენტმა, დონალდ ტრამპმა განაცხადა, რომ რუსეთის წინააღმდეგ ახალ სანქციებს დააწესებს, თუ ვლადიმერ პუტინი უარს იტყვის უკრაინაში ომის დასრულების შესახებ მოლაპარაკებებზე. ინფორმაციას ამის შესახებ CNN ავრცელებს.

დონალდ ტრამპმა აღნიშნა, რომ მზადაა პუტინთან და უკრაინის პრეზიდენტ ვოლოდიმირ ზელენსკისთან შესახვედრად, როცა ისინი მოისურვებენ.

"ჩვენ ვესაუბრებით ზელენსკის. ჩვენ ძალიან მალე ვაპირებთ საუბარს პრეზიდენტ პუტინთან და ვნახოთ, რა როგორ მოხდება", — აღნიშნა ტრამპმა და გააკრიტიკა ევროკავშირი, რომ არ დახარჯა საკმარისი თანხა უკრაინის დასაცავად.

ტრამპმა განაცხადა ისიც, რომ გადახედავს უკრაინისათვის დამატებით იარაღის გაგზავნის საკითხს. ბაიდენის ადმინისტრაცია ბოლო თვეებში ცდილობდა, კიევში რაც შეიძლება დიდი რაოდენობის იარაღი და ფინანსური საშუალებები გაეგზავნა — არსებობს შანსი, რომ ტრამპი გაყინავს იმ თანხებს, რომლებიც 2024 წელს დამტკიცებული დახმარების 61 მილიარდი დოლარიდან დარჩა.