აშშ-ის მიერ სანქცირებულმა ბიძინა ივანიშვილმა პანამურ ოფშორზე Limestone Finance International-ზე რეგისტრირებული კომპანიები ქართულ სააქციო საზოგადოებაზე გადააფორმა, — ინფორმაციას BM.GE ავრცელებს

საჯარო რეესტრში ცვლილება უკვე აისახა და მისი მიხედვით, ივანიშვილის კომპანიები, რომლებიც წარსულში ივანიშვილის პანამური ოფშორის - Limestone Finance International-ის მეშვეობით ეკუთვნოდა, ამჟამად უკვე ქართული კომპანიის სააქციო საზოგადოება "ტერას" მეშვეობით ეკუთვნის.

სს "ტერას" აღნიშნული აქტივები 2024 წლის 31 დეკემბერს გადაუფორმდა. კომპანიაში რეორგანიზაცია სწორედ 31 დეკემბერს განხორციელდა. კომპანიაში რეორგანიზაციის პროცესი ივანიშვილის გენერალური მინდობილობით აღჭურვილმა ნატო ხაინდრავამ წარმართა, რომელიც ორგანიზაციის სამეთვალყურეო საბჭოს თავმჯდომარეა. სს "ტერას" 100%-იანი წილის მესაკუთრე ბიძინა ივანიშვილია და მას პანამური ოფშორიდან შემდეგი აქტივები გადაუფორმდა:

  • შპს სანაპიროს ხედი - 4563 კვადრატული მეტრის მიწის ნაკვეთი და მასზე განთავსებული ნაგებობები აბასთუმანში;
  • შპს ახალი კაპიტალი - 5656 კვადრატული მეტრის მიწის ნაკვეთი და მასზე განთავსებული ნაგებობა თბილისში ერეკლეს მოედანზე;
  • შპს ინვესტ კაპიტალი - 2844 კვადფრატული მეტრის მიწის ნაკვეთი და მასზე განთავსებული ნაგებობა თბილისში თამარაშვილის ქუჩაზე;
  • შპს ქართუ კონსალტინგი;
  • შპს აბასთუმანი 2019 - ივანიშვილის რეზიდენცია აბასთუმანში, 1950 კვადრატული მეტრის მიწის ნაკვეთი;
  • შპს ჯეოფერტ - 20,956 კვადრატული მეტრის მიწის ნაკვეთი კასპში.