გურამ მაცხონაშვილს განყოფილებაში კეფაში რამდენჯერმე ჩაარტყეს. მანამდე სონა კალანდაძეს აგინეს და თმით მოქაჩეს, თმით მოქაჩეს მარიამ პაიჭაძეც, – ამის შესახებ სოციალურ ქსელში სოციალური სამართლიანობის ცენტრის ხელმძღვანელი, თამთა მიქელაძე წერს.

მისი თქმით, პოლიციის განყოფილებაში ერთი სამოქალაქო ფორმაში ჩაცმული ადამიანი აქტივისტების ტელეფონების დათვალიერებას ცდილობდა. სწორედ ამ პროცესში არ იჯერებდნენ, რომ გურამ მაცხონაშვილს საერთოდ არ ჰქონდა ტელეფონი და ამის გამო კეფაში მას რამდენჯერმე ჩაარტყეს. თმა მოქაჩეს მარიამ პაიჭაძეს და სონა კალანდაძეს და აგინეს — სონა კალანდაძეს.

"ახლა გამოვიდა ჩვენი დაუღალავი ადვოკატი მარიამ პატარიძე დროებითი მოთავსების იზოლატორიდან, სადაც თემქაზე დაკავებული აქტივისტები მოინახულა. მათ შორის, არიან მარიამ პაიჭაძე, გურამ მაცხონაშვილი, სონა კალანდაძე.

დაკავებულების თქმით, პოლიციის განყოფილებაში აგრესიულობით გამოირჩეოდა ერთი სამოქალაქო ფორმაში ჩაცმული ადამიანი, რომელმაც საკუთარი თავი არ წარუდგინა მათ.

ის აქტიურად ცდილობდა აქტივისტების ტელეფონების დათვალიერებას. სწორედ ამ პროცესში არ იჯერებდნენ, რომ გურამ მაცხონაშვილს საერთოდ არ ჰქონდა ტელეფონი თან და ამის გამო კეფაში რამდენჯერმე ჩაარტყეს. ეს ყველაფერი პოლიციის განყოფილებაში ხდებოდა.

მანამდე პოლიციის განყოფილებაში შეყვანის დროს სონა კალანდაძეს აგინეს და თმით მოქაჩეს. თმით მოქაჩეს მარიამ პაიჭაძეც.

პოლიცია თავს არ იკავებდა დაკავებულების დაშეიმებისგან და პროტესტში ჩართულობის აბსურდულობაზე უთითებდა. აინტერესებდათ ტატუების მნიშვნელობა და გამოხატავდნენ ირონიას.

დაკავებულებს ნიღბის ტარებას და პოლიციის კანონიერი მოთხოვნის მიმართ დაუმორჩილებლობას ედავებიან. სასამართლო პროცესი წესით ორშაბათს ჩაინიშნება.

მიუხედავად იმისა, რომ აქტივისტებს უარი არ უთქვამთ საკუთარი თავის იდენტიფიცირებაზე და პოლიციას აუხსნეს, რომ ამ პროტესტის მიზანი და ფორმა სწორედ ნიღბების აკრძალვის გაპროტესტება იყო, ისინი მაინც დააკავეს. თან მოულოდნელად, გაფრთხილების და პროტესტის ფორმასთან დაკავშირებული კომუნიკაციის გარეშე.

თუ ეს პროცესი არ გავაჩერეთ, ყველასთან მივა საპოლიციო რეჟიმი", — წერს სოციალურ ქსელში სოციალური სამართლიანობის ცენტრის ხელმძღვანელი, თამთა მიქელაძე.

ცნობისათვის თეატრალური კომპანია ჰარაკის რეჟისორი გურამ მაცხონაშვილი, კამპანია ამომრჩევლების წევრები — მარიამ პაიჭაძე და სონა კალანდაძე გუშინ პოლიციამ თემქაზე საპროტესტო აქციაზე ნიღბების ტარებისა და პოლიციის დაუმორჩილებლობისთვის დააკავა. 18 იანვარს, ამავე მსვლელობაზე დააკავეს ასევე: თამარა ჩუმაშვილი, რომან აკოპოვი და მარიამ გილაშვილი.