მედიის განვითარების ფონდის კვლევის მიხედვით, რომელიც დღეს, 14 ივნისს გამოქვეყნდა, 204-მა საბიუჯეტო ორგანიზაციამ სარეკლამო და საინფორმაციო მომსახურებისთვის მედიასაშუალებებთან სულ 8 202 729 ლარის კონტრაქტი გააფორმა. თუმცა, ეს სრულყოფილი მონაცემები არაა, რადგან ზოგიერთი ორგანიზაცია მონაცემებს არ ასაჯაროებს. აღნიშნული რიცხვები ასახავს 2015 წლის მონაცემებს.

პროცენტულად თანხების ყველაზე დიდი ნაწილი ნაციონალური და შერეული დაფარვის ტელევიზიებზე მოდის 70 %-ით, ონლაინ მედიაზე - 11% და რეგიონულ ტელევიზიებზე - 10%.

ფოტო: MDF

საბიუჯეტო ორგანიზაციებს შორის არიან:

  • 17 სამინისტრო
  • მთავრობის ადმინისტრაცია;
  • პრეზიდენტის ადმინისტრაცია;
  • ეროვნული უშიშროების საბჭო;
  • პარლამენტი და 2 დაქვემდებარებული უწყება;
  • მთავარი პროკურატურა;
  • 2 სასამართლო;
  • სამინისტროს დაქვემდებარებული 3 უწყება, მათ შორის საელჩო;
  • 56 სსიპი;
  • 4 სააქციო საზოგადოება;
  • 2 ააიპი;
  • 9 შპს;
  • 4 აფხაზეთის მტავრობის უწყებები;
  • 4 აჭარის მთავრობის უწყებები;
  • 2 რწმუნებულის აპარატი;
  • თბილისის მერია და 16 მუნიციპალიტეტი;
  • 55 რეგიონალური მუნიციპალიტეტი და 8 დაქვემდებარებული უწყება;
  • 14 მარეგულირებელი და დამოუკიდებელი უწყებები.

კვლევამ აჩვენა, რომ საკომუნიკაციო არხების შერჩევის მკაფიოდ განსაზღვრული კრიტერიუმები და პროცედურები არ არსებობს. კვლევაში სულ 19 სამინისტრო, მთავრობის ადმინისტრაცია, პრეზიდენტის ადმინისტრაცია და თბილისის მერიის საზოგადოებასთან ურთიერთობის დეპარტამენტი მონაწილეობდნენ. კითხვაზე, აქვს თუ არა უწყებას გაწერილი სახით შერჩევის კრიტერიუმები, ყველა მათგანმა უარყოფითი პასუხი გასცა.