დღეს ბათუმში მიმდინარე საპროტესტო აქციაზე ადმინისტრაციული სამართალდარღვევისთვის 8 პირია დაკავებული, — ამის შესახებ ამის შესახებ აჭარის პოლიციის დეპარტამენტის, ბათუმის საქალაქო სამმართველოს უფროსმა ირაკლი დგებუაძემ "ტვ პირველის" ჟურნალისტს განუცხადა.

"ყველა პირი, რომელიც დაკავებული იქნა პოლიციის მიერ, არის ადმინისტრაციული სამართალდარღვევისთვის დაკავებული - 166-ე და 173 მუხლებით, ზოგიერთ მხოლოდ 173-ე მუხლით, რაც პოლიციის შეურაცხყოფისა და წინააღმდეგობის გაწევისთვის. დაკავებულია რვა ადამიანი", — განაცხადა ირაკლი დგებუაძემ.

ფეისბუქ-ჯგუფ "დაიტოვეში" აქტივისტი ილია ღლონტი წერს, რომ დაკავებულთა შორის არიან: შუშანა მაცაბერიძე, ელიზბარ ჩხიკვაძე, გიორგი კირთაძე, ელენე ხოშტარია, ლუკა ნაცვლიშვილი. ცოტა ხნის წინ, ცნობილი გახდა, რომ ბათუმში ასევე დააკავეს "ბათუმელების" კიდევ ერთი თანამშრომელი, გურამ მურვანიძეც.

შეგახსენებთ, რომ გუშინ ბათუმში 10 ადამიანი დააკავეს. მათ შორისაა "ბათუმელებისა" და "ნეტგაზეთის" დამფუძნებელი და დირექტორი, მზია ამაღლობელი, რომელიც 11-12 იანვრის ღამეს 2-ჯერ დააკავეს. პირველად — პოლიციის მთავარ სამმართველოსთან სტიკერის გაკვრის გამო, მეორეს — გათავისუფლებიდან რამდენიმე წუთში.