აშშ-ს წარმომადგენელთა პალატამ მიიღო კანონპროექტი, რომელიც საერთაშორისო სისხლის სამართლის სასამართლოს (ICC) ოფიციალურ პირებს, ისრაელის პრემიერ-მინისტრ ბენიამინ ნეთანიაჰუს დაპატიმრების ორდერის გაცემის საპასუხოდ, სანქციებს უწესებს. ინფორმაციას СNN-ი ავრცელებს.

კანონპროექტი ითვალისწინებს სანქციებს სასამართლოს მიერ განხორციელებული ნებისმიერი ქმედების წინააღმდეგ, რომელიც მიმართულია შეერთებული შტატების და მისი მოკავშირეების ნებისმიერი დაცული პირის გამოძიებასა და დევნაზე. კერძოდ, კანონპროექტი ითვალისწინებს შეერთებულ შტატებში საკუთრებით ტრანზაქციების აკრძალვას ICC-ის გამოძიებასთან დაკავშირებული პირებისთვის, ასევე მათი ვიზების დაბლოკვასა და გაუქმებას.

წარმომადგენლობითმა პალატამ კონგრესის ბოლო სესიაზე ICC-ის სანქციების კანონპროექტი 247 ხმით 155 წინააღმდეგ მიიღო, მხარდამჭერებს შორის 45 დემოკრატი იყო. სენატში კანონპროექტს კენჭს უახლოეს ხანში უყრიან და რესპუბლიკელ პრეზიდენტ დონალდ ტრამპს ხელმოსაწერად ინაუგურაციის შემდეგ გაუგზავნიან.

ისრაელის პრემიერმინისტრ ბენიამინ ნეთანიაჰუს, ისრაელის თავდაცვის ყოფილი მინისტრის იოავ გალანტისა და ჰამასის მაღალჩინოსნის დაპატიმრების ორდერები ICC-მ გასულ წელს გასცა. ჰააგის სასამართლო მათ ბრალს, 2023 წლის 7 ოქტომბერს ისრაელზე ჰამასის თავდასხმების შემდეგ ჩადენილ, სამხედრო დანაშაულში სდებს.

ისრაელის პრემიერმინისტრის ოფისმა უარყო ორდერები და მათ "აბსურდული და ანტისემიტური" უწოდა.