ფრანგული გამოცემა France 24 ინფორმაციას ავრცელებს, სადაც წერია, რომ ფრანგი ულტრამემარჯვენე პოლიტიკოსი, ჟან-მარი ლე პენი 96 წლის ასაკში გარდაიცვალა.

ინფორმაცია გამოცემას ლე პენის ოჯახმა დაუდასტურა.

ფრანგული გამოცემა წერს, რომ "ეროვნული ფრონტის" — საფრანგეთის ულტრამემარჯვენე პარტიის დამფუძნებელი, ჟან-მარი ლე პენი, ადგილობრივი დროით 12:00 საათზე ოჯახის გარემოცვაში გარდაიცვალა.

ჟან-მარი ლე პენმა პარტია "ეროვნული ფრონტი" 1972 წელს დააფუძნა, რომლის პრეზიდენტიც 2011 წლამდე იყო, ხოლო მოგვიანებით, პრეზიდენტის თანამდებობა დაიკავა მისმა ქალიშვილმა — მარინ ლე პენმა.

ჟან-მარი ლე პენი საფრანგეთის 2002 წლის საპრეზიდენტო არჩევნებში მეორე ტურში გავიდა, თუმცა დამარცხდა ჟაკ შირაკთან.

"ეროვნული ფრონტის" დამფუძნებელი, საფრანგეთის პოლიტიკაში გამოირჩეოდა რასასთან, იმიგრაციასა და სქესთან დაკავშირებული საკითხების შესახებ ექსტრემისტული შეხედულებებით.

ამასთან, წარსულში სასამართლომ ჟან-მარი ლე პენი რამდენჯერმე გაასამართლა, მის მიერ, ჰოლოკოსტის შესახებ გაკეთებული განცხადებების გამო. სასამართლომ აღნიშნული განცხადებები ჰოლოკოსტის უარყოფად აღიარა.

"არ ვამბობ, რომ გაზის კამერები არ არსებობდა. მე თვითონ ისინი არ მინახავს. ეს საკითხი ყურადღებით შევისწავლე. მჯერა, რომ ეს მეორე მსოფლიო ომის ისტორიაში მხოლოდ ეპიზოდია", — განაცხადა ფრანგმა პოლიტიკოსმა 1987 წელს, რისთვისაც 183 200 ევროთი დააჯარიმეს.