საქართველოს პროკურატურის განცხადებით, სამართალდამცავებმა დიდი ოდენობით ფულადი თანხის თაღლითურად დაუფლების მცდელობის ბრალდებით თბილისის მერიის ყოფილი თანამშრომელი და კერძო არქიტექტორი დააკავეს.

გამოძიების ვერსიით, თბილისის მერიის არქიტექტურის სამსახურის უფროსის ყოფილმა მოადგილემ, ლევან ძაგნქიძემ, კერძო არქიტექტორ ვ.მ-სთან შეთანხმებით დიდი ოდენობით ფულადი თანხის მოტყუებით დაუფლების მიზნით მოქალაქე ი.ი.-ს შესთავაზეს, რომ ისინი შეძლებდნენ თბილისში, დიდი დიღმის ტერიტორიაზე მდებარე ოთხ სხვადასხვა მიწის ნაკვეთზე განაშენიანების რეგულირების გეგმის შეთანხმებას.

საგამოძიებო უწყება ამტკიცებს, რომ ბრალდებულებმა მოქალაქეს ვითომდა მერიის თანამშრომლებისთვის გადასაცემად ჯამში 38 ათასი აშშ დოლარი მოსთხოვეს, რაც მოქალაქემ მათ სხვადასხვა დროს ეტაპობრივად გადასცა. პროკურატურა აცხადებს, რომ ბრალდებულებმა აღნიშნული თანხა პირადი მიზნებისთვის მოიხმარეს .

ორივე ბრალდებული 30 აგვისტოს თბილისის საქალაქო სასამართლოს მოსამართლის განჩინების საფუძველზე დააკავეს.

დღეს, 31 აგვისტოს დაკავებულებს ბრალი წარედგინათ საქართველოს სისხლის სამართლის კოდექსის 19,180-ე მუხლის მეორე ნაწილის ა და მესამე ნაწილის ბ ქვეპუნქტით, რაც სასჯელის სახედ და ზომად ითვალისწინებს თავისუფლების აღკვეთას ექვსიდან ცხრა წლამდე ვადით.