გერმანიის კანცლერმა, ოლაფ შოლცმა ამერიკელ მილიარდერს და ახლა უკვე ტრამპის ადმინისტრაციის წევრს, ილონ მასკს ირიბად ტროლი უწოდა.

"სოციალურ ქსელებში ბევრია, ვისაც ყურადღების მიპყრობა მკვეთრი ლოზუნგებით სურს. წესი ასეთია: ნუ გამოკვებავთ ტროლს", — განაცხადა გერმანიის მთავრობის მეთაურმა.

ოლაფ შოლცმა შეშფოთება გამოთქვა იმის გამო, რომ ილონ მასკი ღიად უჭერს მხარს ულტრამემარჯვენე, პრორუსულ პარტიას ალტერნატივა გერმანიისთვის.

შოლცის თქმით, შემაშფოთებელია ის ფაქტი, რომ მასკი მხარს უჭერს პარტიას, რომელიც პუტინის რუსეთთან დაახლოების მომხრეა და ტრანსატლანტიკური ურთიერთობების შესუსტებას ცდილობს. ოლაფ შოლცის განცხადებით, საიდუმლო არ არის, რომ ილონ მასკის კომპანია "ტესლა" გერმანიის ელექტრული დამტენი სადგურების მთავრობის მხრიდან დაფინანსების წინააღმდეგი იყო.