მედიის განვითარების ფონდის კვლევის მიხედვით, ხელისუფლების ცალკეულმა უწყებებმა სააგენტო Newspress-ს 2015 წელს სარეკლამო მომსახურებისთვის 23,371 ლარი გადაურიცხეს, ხოლო 2016 წელს აღნიშნული თანხა გაიზარდა და სააგენტომ 28,941 ლარი მიიღო.

MDF-ის თქმით, ნიუსპრესი პრორუსულ პარტია დემოკრატიულ მოძრაობასთან და რუსული პროპაგანდის პლატფორმა სპუტნიკთან არის დაკავშირებული, ის სპუტნიკის პოპულარიზაციასა და ანტიდასავლური გზავნილების რედისტრიბუციას ახდენს და საბიუჯეტო დაფინანსების მიმღებთა შორისაც არის.

როგორც MDF კვლევაში აღნიშნავს, ნიუსპრესის სარედაქციო პოლიტიკა დაკავშირებულია ჰომოფობიური მასალის ირიბ ტირაჟირებასთანაც. 2015 წლის 4 მაისს მან გამოაქვეყნა გაზეთ კვირის ქრონიკის ჰომოფობიური სტატია სათაურით "პოლიტიკური მესაჯდომე კალაძე წინასწარ გვაჩვევს აზრს, რომ პედარასტების აღლუმი მაინც ჩატარდება".

Newspress-ს 2015 წელს, სარეკლამო მომსახურებაზე ხელშეკრულება გაფორმებული ჰქონდა 11 საჯარო უწყებასთან:

  • თავდაცვის სამინისტრო;
  • უნგრეთში საქართველოს საელჩო;
  • თბილისის საკრებულო;
  • აფხაზეთის მთავრობის ცალკეული სტრუქტურები;

MDF-ის ცნობით, აღნიშნული სააგენტოს 2016 წლის რეკლამის დამკვეთებს შორის არიან:

  • სოფლის მეურნეობის სამინისტრო;
  • სასჯელაღსრულებისა და პრობაციის სამინისტრო;
  • განათლების ხარისხის განვითარების ეროვნული ცენტრი.

მედიის განვითარების ფონდი სააგენტოს პარტიულ კავშირებზეც აკეთებს აქცენტს. ნიუსპრესი 2012 წელს ალექსანდრე ჩუბინიძემ დააფუძნა, ის სახალხო კრების პრესსამსახურის ხელმძღვანელი იყო. სახალხო კრება ნინო ბურჯანაძის პარტია დემოკრატიულ მოძრაობასთანაა კავშირში. ამას გარდა, სააგენტოს მომსახურების შემსყიდველთა შორის არის აფხაზეთის მთავრობის რამდენიმე უწყება, მათ შორის ერთ-ერთის ხელმძღვანელი კი ვახტანგ ყოლბაიაა, რომელიც პარტია დემკრატიული მოძრაობის წევრიცაა.

მედიის განვითარების ფონდმა ჩაატარა ვრცელი კვლევა, რომელიც ასახავს სარეკლამო და საინფორმაციო უზრუნველყოფის მიზნით ბიუჯეტიდან მედია საშუალებებში თანხების განაწილებას და სხვა ტენდენციებს.