შინაგან საქმეთა სამინისტროს განცხადებით, ორგანიზებული ჯგუფის მიერ ჩადენილი დიდი ოდენობით თაღლითობის ბრალდებით 4 ადამიანი დააკავეს.

დაკავებული არიან: 2005 წელს დაბადებული ა.ტ. და უცხო ქვეყნის მოქალაქეები – 1988 წელს დაბადებული გ.მ., 2002 წელს დაბადებული რ.დ. და 1997 წელს ი.კ.

დანაშაული 10 წლამდე ვადით თავისუფლების აღკვეთას ითვალისწინებს.

შსს-ის ცნობით, გამოძიებით დადგინდა, რომ მიმდინარე წელს, რამდენიმე თვის განმავლობაში, თბილისის მასშტაბით, შინაგან საქმეთა სამინისტროსა და სხვა ძალოვანი უწყებების სახელით, ისინი უკავშირდებოდნენ მოქალაქეებს და არწმუნებდნენ, რომ მათი ოჯახის წევრის გამო ავტოსაგზაო შემთხვევა მოხდა, ხოლო პრობლემის მოსაგვარებლად ქრთამის სახით საჭირო იყო გარკვეული თანხის გადახდა.

შსს წერს, რომ მოქალაქეებისგან თანხმობის მიღების შემთხვევაში დაკავებულები მათთან მიდიოდნენ ადგილზე, ეცნობოდნენ სხვა სახელითა და გვარით, ართმევდნენ თანხას და კრიპტოვალუტის საფულეზე რიცხავდნენ.

უწყება წერს, რომ შედეგად დაზარალდა ბრალდებულების მიერ ჩადენილი დანაშაულებრივი ქმედებების შედეგად დაზარალდა 61 ადამიანი, თაღლითური გზით მითვისებულმა თანხამ კი ნახევარ მილიონამდე ლარი შეადგინა.

გამოძიება სისხლის სამართლის კოდექსის 180-ე მუხლის მე-3 ნაწილის "ბ" ქვეპუნქტით და მე-4 ნაწილის "ა" ქვეპუნქტით მიმდინარეობს.