საქართველოს პრეზიდენტმა, სალომე ზურაბიშვილმა ბიძინა ივანიშვილი პრეზიდენტის სასახლეში მიიწვია ხელახალი არჩევნების თარიღზე მოსალაპარაკებლად. აღნიშნული განცხადება მან რუსთაველის გამზირზე მიმდინარე აქციაზე გააკეთა.

"არჩევნები არ შედგა. არა მხოლოდ არ შედგა, არ არის აღიარებული არავისგან, არ არის აღიარებული თქვენგან და არ არის აღიარებული ჩვენს უცხოელი პარტნიორებისგან. როცა ეს არჩევნები არ არის ღირებული ვართ ღრმა კრიზისი. გამოსავალი არის ახალი არჩევნები. ამიტომ მე, რომელიც აქ ვარ და აქ ვიქნები, ვეპატიჟები ივანიშვილს, ვეპატიჟები კობახიძეს, პაპუაშვილის და კიდევ ვინც უნდათ, ვეპატიჟები იმ პარტიებს, რომლებიც მონაწილეობდნენ არჩევნებში და იმ ორგანიზაციებს, რომლებიც აკვირდებოდნენ ამ არჩევნებს, მოდით, ორბელიანების სასახლეში, მობრძანდით და მოვილაპარაკოთ, ოღონდ სალაპარაკო მხოლოდ ერთია — როდის და როგორ უნდა დავნიშნოთ არჩევნები.

მოვიდეს სასახლეში ივანიშვილი, რადგან ის მართავს ყველაფერს და მე მზად ვარ, დავსხდეთ და მოვიფიქროთ, როგორ უნდა დაინიშნოს არჩევნები. ოღონდ არჩევნების დანიშვნის რიცხვი უნდა შეთანხმებული იყოს 29-მდე. 29-მდე ჩვენ ყველას გვაქვს დიდი შანსი, რომ ეს ქვეყანა წინ წავწიოთ, რომ ამ ქვეყნიდან მთელ მსოფლიოში წავიდეს დემოკრატიის, შერიგების, წინსვლის მაგალითი. ველოდები პასუხს. ეს ყველაფერი რომ ნათელი იყოს, ხვალ, საღამოს სასახლიდან ჩავწერ სრულ სიტყვას, რადგან აქ არამხოლოდ სცენა, არამედ, როგორც ჩანს, ხმაც დამიპატიმრეს. მაგრამ, არაფერი იქნება. შევხვდებით და გელოდებით", — განაცხადა სალომე ზურაბიშვილმა.