დიარეა, იგივე ფაღარათი საკმაოდ გავრცელებული პრობლემაა, რომელიც შესაძლოა გამოწვეული იყოს საკვებით ინტოქსიკაციით, ინფექციებით ან ვირუსებით, სტრესით, ასევე გარკვეული მედიკამენტებით, რომლებიც არღვევენ ნაწლავის მიკრობიომის ბალანსს... დიარეის შემთხვევათა უმეტესობა თავისით წყდება, მაგრამ თუ პროცესი გახანგრძლივდა, აუცილებელია მკურნალობა.

დიარეის სამკურნალო ერთ-ერთი პრეპარატია სმექტა, რომელიც გამოიყენება როგორც დიარეის მსუბუქი შემთხვევების დროს, ასევე ქრონიკული დიარეის სამკურნალოდ.

უკუჩვენებები — რა უნდა ვიცოდეთ სმექტას მიღებამდე?

სმექტას უკუჩვენებად შეიძლება ჩაითვალოს ჰიპერმგრძნობელობა დიოსმექტიტის ან პრეპარატის შედგენილობაში შემავალი რომელიმე სხვა ნივთიერების მიმართ.

მკურნალობის პერიოდში ყველაზე ხშირად აღნიშნული არასასურველი რეაქცია არის შეკრულობა, რომელიც ვითარდება მოზრდილების დაახლოებით 7%-ში და ბავშვების დაახლოებით 1%-ში. იმ შემთხვევაში, თუ შეკრულობა განვითარდება, საჭიროა დიოსმექტიტის მიღების შეწყვეტა.

არასასურველი სამკურნალწამლო რეაქციები, რომლებიც კლინიკურ კვლევებში აღინიშნა არის კუჭ-ნაწლავის ტრაქტის დარღვევები, შეკრულობა, კანისა და კანქვეშა ქსოვილების დარღვევები, გამონაყარი, ჭინჭრის ციება.

სმექტა სიფრთხილის ზომების დაცვით უნდა მიიღონ ანამნეზში მძიმე ქრონიკული შეკრულობის მქონე პაციენტებმა.

პაციენტი უნდა იყოს ინფორმირებული, რომ საჭიროა:

● რეჰიდრატაციის უზრუნველყოფა საკმარისი რაოდენობის მარილიანი ან ტკბილი სასმლით, დიარეით გამოწვეული სითხის დაკარგვის აღდგენის მიზნით (მოზრდილებში დღე-ღამეში წყლის მოთხოვნილება შეადგენს, საშუალოდ, 2 ლიტრს);

● საკვების მიღების უზრუნველყოფა დიარეის დროს, ზოგიერთი საკვების გამოკლებით, მაგალითად, უმი ბოსტნეული და ხილი, მწვანე ბოსტნეული, ცხარე საკვები, ასევე გაყინული საკვები ან სასმელი.

როგორ უნდა მივიღოთ სმექტა და როგორია რეკომენდებული დოზები ბავშვებისა თუ მოზრდილებისთვის?

ჩვილებსა და ბავშვებში მწვავე დიარეის სამკურნალოდ პრეპარატი ინიშნება შემდეგი დოზებით: 1 წლამდე ასაკში: 2 პაკეტი დღეში 3 დღე, შემდეგ კი 1 პაკეტი დღეში; 1 წლისა და უფროსი ასაკის ბავშვებში: 4 პაკეტი დღეში, 3 დღის განმავლობაში, შემდეგ 2 პაკეტი დღეში.

მოზრდილებმა პრეპარატი უნდა მიიღოთ, საშუალოდ, 3 პაკეტი დღეში. საჭიროების შემთხვევაში, მკურნალობის საწყის პერიოდში, სადღეღამისო დოზა შეიძლება გაორმაგდეს.

ეზოფაგიტის შემთხვევაში პრეპარატი მიიღეთ ჭამის შემდეგ, სხვა შემთხვევებში — კვებათა შორის.

მკურნალობის ხანგრძლივობა შეადგენს 7 დღეს. იმ შემთხვევაში, თუ 7-დღიანი მკურნალობის შემდეგ მდგომარეობა არ გაუმჯობესდება, საჭიროა ექიმთან კონსულტაცია.

პრეპარატი მიიღება პერორალურად. პაკეტის შიგთავსი წყალში უშუალოდ მიღების წინ უნდა გახსნათ.

ჩვილებსა და ბავშვებში პაკეტის შიგთავსი შეგიძლიათ გახსნათ საკვების ბოთლში 50 მლ წყალში და პერიოდულად მისცეთ ბავშვს დღის განმავლობაში, ან შეურიოთ ნახევრად თხევად საკვებში, როგორიცაა ბულიონი, კომპოტი, პიურე, ბავშვის საკვები და სხვა.

მოზრდილებმა პრეპარატის მისაღებად პაკეტის შიგთავსი უნდა გახსნათ ნახევარ ჭიქა წყალში.