ევროკავშირის საბჭომ რუსეთის წინააღმდეგ ეკონომიკური და ინდივიდუალური სანქციების ახალი პაკეტი მიიღო, რომელიც რიგით მე-15 არის.

ამ შეზღუდვების მიზანია, რომ რუსეთს უკრაინის მიმართ უკანონო, არაპროვოცირებული და გაუმართლებელი ომის შესაძლებლობა უფრო მეტად შეუზღუდოს.

როგორც ცნობილია, ევროკავშირის საბჭოს მიერ დაწესებული ახალი სანქციები 15 ფიზიკურ პირსა და 30 ორგანიზაციას ეხება. ისინი პასუხისმგებელნი არიან ქმედებებზე, რომლებიც უკრაინის ტერიტორიულ მთლიანობას, სუვერენიტეტსა და დამოუკიდებლობას საფრთხის წინაშე აყენებს.

სანქცირებულთა სიაშია რუსული თავდაცვის კომპანიები და გადამზიდავი სერვისები, რომლებსაც ზღვის გავლით ნედლი ნავთობი და ნავთობპროდუქტები გადააქვთ. ეს კი რუსეთის მთავრობის ბიუჯეტში დიდი შემოსავლის შემტანია. ასევე, სიაში მოხვდა ქიმიური ქარხანა, რუსული სამოქალაქო ავიაკომპანია, რომელიც რუსეთის არმიის ლოგისტიკური მხარდაჭერის მნიშვნელოვანი მიმწოდებელია.

აგრეთვე, პირველად ევროკავშირმა სრული სანქციები დაუწესა ჩინელ აქტორებს, რომლებიც რუსეთის აგრესიულ ომს თვითმფრინავის კომპონენტებისა თუ მიკროელექტრონული კომპონენტების მიწოდებით უჭერენ მხარს. სრული სანქციები მოიაზრებს მოგზაურობის აკრძალვას, აქტივების გაყინვასა და ეკონომიკური რესურსების ხელმისაწვდომობის აკრძალვას.