აზერბაიჯანის პრეზიდენტმა, ილჰამ ალიევმა მიხეილ ყაველაშვილს პრეზიდენტად არჩევა მიულოცა და წერილი გაუგზავნა. ამ დროისთვის პირველი მილოცვა ყაველაშვილმა სხვა ქვეყნის მხოლოდ ერთი პრეზიდენტისგან მიიღო.

მილოცვის ტექსტს აზერბაიჯანის პრეზიდენტის ოფიციალურ ვებსაიტზე ვკითხულობთ.

წერილში ალიევი გამოთქვამს იმედს, რომ ორ ქვეყანას შორის ურთიერთობა უფრო გაღრმავდება.

"მჯერა, რომ ყველა ღონეს ვიხმართ, რათა კიდევ უფრო გაღრმავდეს და გაფართოვდეს სახელმწიფოთაშორისი ურთიერთობა და სტრატეგიული პარტნიორობა ჩვენი ქვეყნებისა და ხალხების კეთილდღეობისთვის.

რათა უზრუნველვყოთ ჩვენი რეგიონის უსაფრთხოება და სტაბილურობა, მისი ეკონომიკური პოტენციალის რეალიზება", — სწერს ილჰამ ალიევი მიხეილ ყაველაშვილს.

შეგახსენებთ, დღეს, 14 დეკემბერს პარლამენტის შენობაში ჩატარებული კენჭისყრის შედეგად დელეგატებმა პრეზიდენტად არაპირდაპირი გზით "ქართული ოცნების" მიერ დასახელებული ერთი კანდიდატი ყოფილი ფეხბურთელი და მეცხრე-მეათე მოწვევის პარლამენტის წევრი მიხეილ ყაველაშვილი აირჩიეს.

კენჭისყრა ღია წესით ჩატარდა, ჯერ პარლამენტის წევრებმა, შემდეგ კოლეგიაში მყოფი სხვა სახელმწიფო ორგანოების წარმომადგენლებმა ხმა ანბანური თანმიმდევრობით მისცეს.

აღსანიშნავია, რომ 26 ოქტომბრის ჩატარებულ საპარლამენტო არჩევნებში ბარიერგადალახული ოპოზიცია არ მონაწილეობდა კენჭისყრაში.

ამასთან, საპარლამენტო არჩევნების შედეგებს და პარლამენტის ლეგიტიმურობას არ აღიარებენ ბარიერგადალახული ოპოზიციური პარტიები, საქართველოს პრეზიდენტი და მოქალაქეები, რომლებიც უკვე თექვსმეტი დღეა რაც ახალი საპარლამენტო არჩევნების დანიშვნას საპროტესტო აქციების მეშვეობით ითხოვენ.