"გუშინ დაისვენეს, დღეს გაიღიმა კობახიძემ და საღამოს ტერორი მოაწყვეს!!!", — ამის შესახებ სოციალურ ქსელში საქართველო პრეზიდენტი, სალომე ზურაბიშვილი წერს. მისივე თქმით, ტყუილია ოცნების პრემიერის სიტყვები, რომ "ძალადობა შეჩერდა". სალომე ზურაბიშვილი კითხვას სვამს: თუ "ძალადობა შეჩერდა, რა არის დღევანდელი სასტიკის დარბევის მიზანი? დედისგან შვილის გატაცება? შურისძიება ქალებზე?"

თავისუფლების მოედანზე წყლის ჭავლის მანქანა და სპეცტექნიკა 23:00 საათიდან განლაგდა, რის შემდეგაც, სპეცრაზმმა რუსთაველის გამზირზე აქციის დაშლა დაიწყო.

მანამდე პოლიცია მეტრო თავისუფლების მოედანზე აქციაზე მომავალ მოქალაქეებს კვლავ ჩხრეკდა. მეტროში, ესკალატორზე დააკავეს ერთი პირი. პოლიციის თქმით, მოქალაქის დაკავების მიზეზი მოქალაქის მხრიდან "პოლიციელების მიმართ სიტყვიერი შეურაცხყოფა" გახდა. ჩხრეკასთან დაკავშირებით სამართალდამცველები მედიასთან განმარტავდნენ, რომ გატარებული ღონისძიება არა ჩხრეკა, არამედ "ზედაპირული შემოწმება" იყო.

დაკავება მეტროში

დაკავება მეტროში

ფოტო: ინტერპრესნიუსი

რუსთაველის გამზირის გარდა, სპეცრაზმია განლაგდა რესპუბლიკის მოედანზეც, რის შემდეგაც აქციის მონაწილეები ფაქტობრივად ალყაში მოაქციეს. საპოლიციო ძალებმა 7 დეკემბრის ღამეს აქციის დასაშლელად გამოიყენეს წყლის ჭავლი და სხვა სპეციალური საშუალებები — გაზის კაფსულები, ხოლო დემონსტრანტები ისროდნენ პიროტექნიკას.

მას შემდეგ, რაც სპეცრაზმმა რუსთაველის გამზირი დაიკავა, აქციის მონაწილეთა ნაწილმა მტკვრის მარჯვენა სანაპიროზე გადაინაცვლა, იქიდან კი გმირთა მოედნისკენ გადაინაცვლეს. აქციის მონაწილეებმა საპროტესტო მსვლელობა თამარაშვილის გამზირზე დაასრულეს.

7 დეკემბრის ღამეს საპოლიციო ძალებმა დააკავეს რამდენიმე პირი, მათ შორის "კოალიცია ცვლილებისთვის" წევრი ცოტნე კობერიძე, რომელიც მოგვიანებით გაათავისუფლეს. დააკავეს ასევე ეკონომიკის მინისტრის ყოფილი მოადგილე, ნიკა ალავიძე და მთავარი არხის ჟურნალისტი, ბექა ყორშია. დაკავებულთა რაოდენობის შესახებ ოფიციალური ინფორმაცია არ ვრცელდება.