საქართველოს პრეზიდენტმა, სალომე ზზურაბიშვილმა TVP World-თან ინტერვიუში საუბრისას აღნიშნა, რომ "ბევრი რამ ჩვენს ევროპელ პარტნიორებზეა დამოკიდებული".

ზურაბიშვილმა კითხვას, თუ რას მოელის ევროპელი პარტნიორებისგან უპასუხა, რომ ელის სანქცირებას იმ ადამიანების, რომლებიც რეპრესიებსა და არჩევნების გაყალბებაზე არიან პასუხისმგებლები.

"ბევრი რამ მათ მკაფიო გზავნილებსა და მკაფიო გადაწყვეტილებებზეა დამოკიდებული. ცხადია, სანქციების დაწესება იმ ადამიანების წინააღმდეგ, რომლებიც რეპრესიებსა და არჩევნების გაყალბებაზე პასუხისმგებლები არიან. ყველა მათგანი იდენტიფიცირებულია და ეს მკაფიო გზავნილი იქნება იმისა, რომ როცა ევროკავშირი სიტყვას იძლევა, იგი სიტყვას ასრულებს", — განაცხადა ზურაბიშვილმა.

საქართველოს პრეზიდენტმა ასევე აღნიშნა, რომ დროა ევროკავშირმა შესაბამისი ზომები მიიღოს იმასთან დაკავშირებით, რაც საქართველოში ხდება.

"იმისთვის, რომ შეაჩერო რაც აქ ხდება, ან ხვალ შეიძლება სხვაგან მოხდეს, რეაგირებაა საჭირო და რეაგირებაა საჭირო უკრაინის მხარდასაჭერადაც, რადგან ყველაფერი, რაც უკრაინაში ხდება, რა თქმა უნდა, გავლენას საქართველოზე ახდენს. ასე რომ, ეს მთელი სურათია, რომელშიც რუსეთს არ უნდა მიეცეს იმის საშუალება, რომ იგრძნოს შეუძლია გააკეთოს ის, რაც სურს და გამოიყენოს ის, რასაც იგი დასავლეთის სისუსტედ აღიქვამს", — აღნიშნა ზურაბიშვილმა.