ხალხთან ერთად, ვიქნები სადაც შევძლებ, ყოველთვის. იწყება წინააღმდეგობა, რომელიც არ დამთავრდება, სანამ ჩვენ არ მივიღებთ ახალ არჩევნებს, — ამის შესახებ საქართველოს პრეზიდენტმა სალომე ზურაბიშვილმა რუსთაველის გამზირზე საპროტესტო აქციაზე მისვლისას განაცხადა. მისი თქმით, სწორედ ახალი არჩევნების ჩატარებაა მიზანი.

"დღეს უკვე ყველაფერი ვუთხარი საზოგადოებას, ყველას მოვუწოდე, ვინც უნდა შემოგვიერთდეს. მე ვარ აქ, ამ ხალხთან ერთად, ვიქნები სადაც შევძლებ, ყოველთვის. იწყება წინააღმდეგობა, რომელიც არ დამთავრდება, სანამ ჩვენ არ მივიღებთ ახალ არჩევნებს, ეს არის მიზანი შიგნით, ეს არის მიზანი გარეთ, რომელზედაც ასევე ვმუშაობ, რომ ამაში გვქონდეს სრული მხარდაჭერა. ჩვენ არ უნდა დავნებდეთ, ეს არის წინააღმდეგობა", — განაცხადა სალომე ზურაბიშვილმა.

პრეზიდენტმა საპროტესტო აქციაზე მისვლის გადაწყვეტილება მას შემდეგ მიიღო, რაც მოქალაქეებმა მისი ხალხის გვერდით დგომა მოითხოვა.

შეგახსენებთ, რომ თბილისსა და საქართველოს დიდ ქალაქებში: ბათუმში, ქუთაისში, ზუგდიდში, ფოთსა და გორში სპონტანურად, მას შემდეგ დაიწყო საპროტესტო აქციები, რაც ქართული ოცნების ხელისუფლებამ განაცხადა, რომ წყვეტს ევროკავშირთან ინტეგრაციის პროტესტს.

აქციის მონაწილეები ჯერ ქართული ოცნების გორგასლის ოფისში მივიდნენ, შემდეგ რუსთაველის გამზირზე, პარლამენტთან გადაინაცვლეს.