მთავარ არხთან ინტერვიუში მოქალაქე გოჩა ჩალაურმა 26 ოქტომბრის არჩევნების გაყალბების სქემაზე ისაუბრა. მან დაასახელა საჯარო პირები, რომლებიც გაყალბებაზე პასუხისმგებელი ჯგუფების ადმინისტრირებაზე იყვნენ პასუხისმგებელი.

გოჩა ჩილაურის თქმით, ის 26 ოქტომბერს სამ სხვა ადამიანთან ერთად გადაადგილდებოდა გორის რაიონში — საარჩევნო უბანთან ხვდებოდნენ ადამიანს, რომლისგანაც იღებდნენ ქაღალდს კონკრეტული ამომრჩევლის საიდენტიფიკაციო მონაცემებით. საარჩევნო უბანზე ისინი ძირითადად მარკირების გარეშე შედიოდნენ, გადიოდნენ ვერიფიკაციას წინასწარ შერჩეულ დამკვირვებელთან და ამ გზით სხვის ნაცვლად აძლევდნენ ხმას. ამის შემდეგ, ჯგუფი სხვა უბანზე გადაადგილდებოდა — ჩილაურის განცხადებით, მხოლოდ მან 30-ჯერ მისცა ხმა.

ჩალაური ფიქრობს, რომ 26 ოქტომბერს, მხოლოდ გორის მუნიციპალიტეტში, ამ სქემით ჯამში 120-130 მანქანა მოძრაობდა.

"იქა პასპორტს არც უყურებდნენ. მე მაგალითად, ჩემი პასპორტით შევდიოდი. ვადაგასული იყო, საზღვარგარეთის პასპორტი. ფურცელს ნახავდნენ, პასპორტს უკან მაწვდიდნენ, ამ ფურცლიდან იწერდნენ პირად ნომერს და აი, მაგით ვაგდებდით ბიულეტენს. ალბათ … ყველა უბანში, სადაც სოფელში მივდიოდით, რომელ სოფელსაც მოვივლიდი, ყველა უბანზე შესული ვარ. ალბათ, ერთი 30 უბანზე შესული ვარ მარტო მე", — განაცხადა გოჩა ჩალაურმა მთავართან ინტერვიუში.

გოჩა ჩალაურის მიერ დასახელებულ ადამიანებს შორის არიან შიდა ქართლის რწმუნებულის მოადგილე, თემურ ხუბულური და გორის მერის მოადგილე, თამაზ შიოშვილი. ჩალაურის თქმით, მას პირადად შიოშვილი დაუკავშირდა და სთხოვა ამ სქემაში მონაწილეობა. ჩალაურის მონათხრობი ორივე მათგანმა უარყო.