საპარლამენტო სიების ჩახსნის მოთხოვნით საკანონმდებლო ორგანოში განცხადებას კოალიცია ძლიერი საქართველო ხვალ, 26 ნოემბერს გააგზავნის, — ამის შესახებ კოალიციის ერთ-ერთმა ლიდერმა, სალომე სამადაშვილმა განაცხადა.

სალომე სამადაშვილმა ტვ პირველის ეთერში თქვა, რომ პოლიტიკური გაერთიანების პოზიცია, რომ პარლამენტს ლეგიტიმაციას არ ანიჭებს, ძალაში რჩება.

"ჩვენ ამაზე ძალიან დიდი ხანია დაფიქსირებული გვაქვს პოზიცია. იმ გეგმაში, რომელიც წარვადგინეთ. იქ ერთ-ერთი მთავარი პუნქტი იყო სწორედ ის, რომ ერთობლივად გადავდგათ ნაბიჯი 4-მა პარტიამ მათ შორის, პრეზიდენტის ეგიდის ქვეშ, რომ ვთქვათ, რომ ჩვენ ამ პარლამენტს არ ვანიჭებთ ლეგიტიმაციას, რაც ნიშნავს სიების ჩახსნას, მანდატებზე უარის თქმას. ჩვენ წავალთ ჩვენი პროცესით, ჩვენ მიგვაჩნია, რომ სწორი იქნებოდა, თუ ეს ერთობლივად გაკეთდებოდა. მაგრამ რადგან დაიწყო ეს პროცესი, ჩვენც გვექნება ხვალ შესაბამისი ოფიციალური დაფიქსირება. მოვლენებს წინ არ გავუსწრებ", — ამბობს სალომე სამადაშვილი.

ცნობისთვის, რუსთაველის გამზირზე გამართულ საპროტესტო აქციაზე ერთიანობა ნაციონალური მოძრაობის ერთ-ერთმა ლიდერმა, გიორგი ვაშაძემ განაცხადა, რომ პარლამენტს მანდატის შეწყვეტის მოთხოვნით უკვე მიმართა.

გიორგი ვაშაძის შემდეგ, სიების ჩახსნის მოთხოვნით კოალიცია "ცვლილებებისთვის" წარმომადგენელმა ცესკოს მიმართა.