ოკუპირებული აფხაზური ე.წ. ოპოზიციის ერთ-ერთმა ლიდერმა ინტერვიუ მისცა რუსულ გამოცემა ვედომოსტს. ადგურ არძინბა ამბობს, რომ არ არის მიღებული საბოლოო გადაწყვეტილება თვითგამოცხადებული რესპუბლიკის საპრეზიდენტო არჩევნებში მის მონაწილეობასთან დაკავშირებით, მაგრამ როგორც ეხო კავკაზა წერს — "არ არსებობს დამაჯერებელი მიზეზები უმაღლეს სამთავრობო პოსტზე ბრძოლაზე უარის თქმისთვის".

გარდა ამისა, მან განმარტა, თუ რატომ დაუპირისპირდა ოპოზიცია რუსეთთან "საინვესტიციო ხელშეკრულებას" და უპასუხა კითხვაზე, თუ რამდენად შესაძლებელია საქართველოს მოქალაქეები რუსული პასპორტით ფლობდნენ ობიექტებს.

მისი თქმით, ბჟანიამ ოკუპირებულ აფხაზეთში ფარულად ჩამოიყვანა რამდენიმე ქართველი დეპუტატი .

"აღსანიშნავია, რომ ჩვენ ვაცნობიერებთ ქართველი ოლიგარქის ჩვენთან შემოღწევის საფრთხეს. იმის გათვალისწინებით, რომ ბატონმა ბჟანიამ ფარულად ჩამოიყვანა რამდენიმე ქართველი დეპუტატი აფხაზეთში და, ჩვენი ინფორმაციით, აქტიურად უკავშირდებოდა რუსეთში ქართული დიასპორის წარმომადგენლებს. და აქვე უნდა გვახსოვდეს, რომ ბატონ ბჟანიას 1990-იან წლებში, საქართველოსთან ომის დროს არანაირი კავშირი არ ჰქონდა. ის აფხაზეთის პოლიტიკაში მხოლოდ 2010 წელს გამოჩნდა, მას შემდეგ რაც რუსეთმა ჩვენი დამოუკიდებლობა აღიარა", - აღნიშნა არძინბამ.

ოპოზიციონერმა ასევე კომენტარი გააკეთა საქართველოს ხელისუფლების მხრიდან არსებულ შერიგების სიგნალებზე:

"სიგნალები კარგია, ჩვენ შეგვიძლია მხოლოდ მივესალმოთ მათ, მაგრამ მოცემულობას უნდა შევხედოთ. გვახსოვს, რომ საქართველოს ყოფილმა პრეზიდენტმა მიხეილ სააკაშვილმა სამხრეთ ოსეთში პრობლემის ძალისმიერი გადაწყვეტის მცდელობამდე რამდენიმე თვით ადრე ისაუბრა შერიგების შესაძლებლობაზე. ახლა პარტია ქართული ოცნება საკმაოდ დიდი ხანია, 2012 წლიდან არის ხელისუფლებაში, მაგრამ რეალური ნაბიჯები ურთიერთობების ფუნდამენტურად დარეგულირებისკენ არ გადადგმულა. არსებობს ეგრეთ წოდებული კანონი "ოკუპირებული ტერიტორიების შესახებ", რომელიც სერიოზულ სირთულეებს უქმნის ჩვენს ქვეყანაში უცხოურ ინვესტიციებს, საგარეო ეკონომიკურ ურთიერთობებს და ბიზნესის ნორმალურ ფუნქციონირებას. ჩვენ შეგვიძლია დავიწყოთ, მაგალითად, ამ კანონის გაუქმებით".

მოსკოვისა და თბილისის დაახლოების ფონზე საქართველოსთან კონფლიქტის მოგვარების შესახებ კითხვას არძინბამ უპასუხა, რომ მათი პოზიცია ნათელია — "აფხაზეთი დამოუკიდებელი სახელმწიფოა".

"დიახ, მართლაც, საქართველომ რუსეთის წინააღმდეგ სანქციები არ დააწესა, ამ მხრივ ისინი კარგად იქცევიან, მაგრამ უახლესი ისტორია ვარაუდობს, რომ მის ხელმძღვანელობას შეუძლია საკმაოდ დრამატული პოლიტიკური მანევრების განხორციელება. შეგახსენებთ, რომ თბილისის ოფიციალური კურსი, თუნდაც მმართველი ქართული ოცნების პირობებში, რომელიც ასევე ჯერ კიდევ საქართველოს კონსტიტუციაშია დაფიქსირებული, არის კურსი ევროპული და ჩრდილოატლანტიკური ინტეგრაციისკენ. ჩვენ, ჩვენი ხალხები, საქართველო და აფხაზეთი ასობით წელია მეზობლები ვართ, დამიჯერეთ, ვიცით რაზეც ვსაუბრობთ. ამასთან, ჩვენი პოზიცია ნათელია - ჩვენ ვართ დამოუკიდებელი სახელმწიფო. ნებისმიერი ნაბიჯი შერიგებისა და ურთიერთობების ნორმალიზაციისკენ უნდა დაიწყოს ამ მარტივი ნაბიჯით - ისტორიული და ფაქტობრივი რეალობის აღიარებით".

შეგახსენებთ, რომ რუსულ-აფხაზური „საინვესტიციო შეთანხმების“ წინააღმდეგ დაწყებული პროტესტის და ოპოზიციის წევრების დაპატიმრების და შემდეგ საპატიმროებიდან გათავისუფლების შემდეგ, ოკუპირებული აფხაზეთის ე.წ. პრეზიდენტმა თანამდებობა დატოვა. ოკუპირებულ აფხაზეთში ახალი საპრეზიდენტო არჩევნები თებერვალშია დაგეგმილი.