ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, ჯოზეფ ბორელი ევროკავშირს მთავრობისთვის დაფინანსების შეწყვეტას და სანაცვლოდ, სამოქალაქო ორგანიზაციების დაფინანსებას სთავაზობს. ამის შესახებ ჯოზეფ ბორელმა სამიტის დაწყებამდე მთავარი არხის შეკითხვის პასუხად განაცხადა.

"საქართველო არის ის საკითხი, რომელსაც დღეს განვიხილავთ. მე ვთავაზობ შეწყვეტას დახმარებისა, პროგრამებისა, რომლებიც მიდის მთავრობისთვის, რამდენიმე მილიონი ევრო იქნება გაყინული და სანაცვლოდ მიეწოდება სამოქალაქო ორგანიზაციებს. ჩვენ ავიღებთ იმ ფულს რომელსაც ვაწვდით მთავრობას და მივაწვდით სამოქალაქო საზოგადოების ორგანიზაციებს, რომლებიც იბრძვიან სამართლიანი არჩევნებისთვის. ხალხმა უნდა იგრძნოს, რომ ევროკავშირი მათ მხარს უჭერს კვლავ და გაწევრიანების პროცესი შეწყვეტილი იქნება მანამდე, სანამ მთავრობა არ დაუბრუნდება ევროინტეგრაციის გზას. ამასობაში ჩვენ იმ ფულს, რომელიც განკუთვნილი იყო მთავრობისთვის, გადავცემთ სამოქალაქო საზოგადოებას", — განაცხადა ბორელმა.

ჯოზეფ ბორელი ასევე აცხადებს, რომ არჩევნები საერთაშორისო საზოგადოების მიერ უნდა იყოს გამოძიებული.

"რა თქმა უნდა, უნდა იყოს გამოძიება, რაც მოხდა ის უნდა იყოს სრულად შეფასებული. არ შეიძლება თქვა, რომ არჩევნები არ იყო სამართლიანი და ის არ გამოიძიო. ჩვენ მოვუწოდებთ მთავრობას, ნათელი მოჰფინოს ყველაფერს, რასაც ითხოვს ხალხი, უნდა იყოს ანგარიშვალდებულება", — განაცხადა ჯოზეფ ბორელმა.

ბრიუსელში დღეს ევროკავშირის საგარეო საქმეთა საბჭო 26 ოქტომბერს გამართული საპარლამენტო არჩევნების ფონზე საქართველოში არსებულ ვითარებაზე იმსჯელებს.

ამის პარალელურად, ოთხმა პროდასავლურმა ოპოზიციურმა პარტიამ – კოალიცია ცვლილებისთვის, ძლიერი საქართველო, ენმ და გახარია საქართველოსთვის საგარეო პოლიტიკისა და უსაფრთხოების საკითხებში ევროკავშირის უმაღლეს წარმომადგენელს, ჯოზეფ ბორელსა და ევროკავშირის წევრი სახელმწიფოების საგარეო საქმეთა მინისტრებს ერთობლივი წერილით მიმართა. ოპოზიციური პარტიები მოუწოდებენ ევროკავშირს, არ აღიაროს საქართველოში ჩატარებული არჩევნები.