ონლაინმედია "მაუწყებელი"-ს ცნობით, ჭიათურის ცენტრში მაღაროელები საპროტესტო შეკრებას მართავენ.


პროტესტის მონაწილეების თქმით, წარმოების დროებითი შეჩერების ფონზე, კომპანიის მიერ შემოთავაზებული ხელფასის 60%-იანი კომპენსაცია ვერ დააკმაყოფილებს მათ ყოველდღიურ საჭიროებებს. მაღაროელები ამბობენ, რომ მათი მოთხოვნა ასევე იყო საბანკო სესხების დროებითი შეჩერება, რაც კომპანიას უნდა უზრუნველეყო.
"ჯორჯიან მანგანეზი" დასაქმებულებს სესხების სხვა ბანკში გადატანას სთავაზობს, რაც ასევე დროში გაწელილი პროცესია. მაღაროელების თქმით, მოლაპარაკების პროცესის მიმართ ნდობა აღარ აქვთ, რადგან დამსაქმებელმა 2023 წლის გაფიცვის პირობები არ შეასრულა და ისინი არაერთხელ მოატყუა.


ტარიელ მიქაცაძის თქმით, მაღაროელები კომპანიის წარმომადგენლებს შეხვდნენ და უთხრეს, რომ დადიოდა ხმები, ნოემბრიდან წარმოების შეჩერების შესახებ, რაც კომპანიამ უარყო. თუმცა პირველ ნოემბერს წარმოება მაინც შეჩერდა, რაზეც მაღაროელებმა GM-ს სახელმწიფო ნებართვის დამადასტურებელი დოკუმენტაცია მოსთხოვეს, კომპანიამ კი ეს ნებართვაც წარმოადგინა.

"ორ დღეში ეს არ ხდება. ეს იყო კარგად დაგეგმილი, თვეებით ადრე. არჩევნების ჩავლის შემდეგ გააკეთეს, რაც უნდოდათ," — ამბობს მიქაცაძე მაუწყებელთან


მაღაროელები აპირებენ, რომ ჭიათურიდან მანგანუმის გატანის პროცესი შეაჩერონ.
დღევანდელი პროტესტის დროს მშრომელებმა ისაუბრეს ნაციონალიზაციის მნიშვნელობაზეც. მერაბ სარალიძის განცხადებით, მნიშვნელობა არ აქვს რომელი ბიზნესმენის ხელში იქნება საწარმო, საწარმო უნდა ეკუთვნოდეს მოსახლეობას და მათ მიმართ პასუხისმგებლობა სახელმწიფომ აიღოს.