"სრული პასუხისმგებლობით გეუბნებით — ფაქტი არ არსებობს ბუნებაში, რომ არჩევნები გაყალბდა, — ამის შესახებ კახა კალაძემ ჟურნალისტებთან საუბრისას განაცხადა. მისი თქმით, NDI-ის და IRI-ის დაფინანსებით ტრენინგებს გადიოდნენ პარტიები როგორ უნდა მოახდინო ამომრჩეველთან კომუნიკაცია, ამომრჩევლის მობილიზება, ეს ჩვეულებრივი პროცესია, რასაც ყველა პოლიტიკური პარტია იყენებს.

"ნახეთ რამხელა სხვაობაა ქართულ ოცნებასა და მეორე ადგილზე გასულ პოლიტიკურ პარტიას შორის, ხმების რაოდენობით, გინდ პროცენტულად. არანაირი ფაქტი, მტკიცებულება არ არსებობს, ყველანაირი რესურსი ამოწურეს, თენგოსაც არაფერი აღარ დარჩა სათქმელი, ნოდარ მელაძის გაუგებარი სიუჟეტით სპეკულირებენ. რა თქმა უნდა, ამომრჩევლის მობილიზებაში პარტია ჩართულია და შალვამაც გააკეთა ამასთან დაკავშირებით განცხადებაში. NDI-ის და IRI-ის დაფინანსებით ტრენინგებს გავდიოდით პარტიები, თუ როგორ უნდა მოახდინო ამომრჩეველთან კომუნიკაცია, ამომრჩევლის მობილიზება, არჩევნების დღეს რა უნდა გააკეთო, როგორ უნდა შექმნა ჯგუფები, რომლებიც უზრუნველყოფენ მხარდამჭერების მოყვანა და ა.შ. ეს ჩვეულებრივი პროცესია, რასაც იყენებს ყველა პოლიტიკური პარტია," — განაცხადა კახა კალაძემ.