თალიბანის მინისტრმა სათნოების გავრცელებისა და მანკიერების პრევენციის საკითხებში, მუჰამედ ხალიდ ჰანაფიმ განაცხადა, რომ ავღანელ ქალებს ამიერიდან აღარ შეეძლებათ ყურანის ხმამაღლა წაკითხვა, მაშინაც კი, თუ ისინი სხვა ქალთა გარემოცვაში არიან.

ამის შესახებ თალიბანის წარმომადგენელმა Amu TV-ის, შეერთებულ შტატებში დაფუძნებულ ავღანურ მედიას განუცხადა.

"ქალებს არ აქვთ ნებართვა, რომ შეასრულონ თაკბირი ან აზანი (ისლამური ლოცვები). მათ ასევე არ შეუძლიათ იმღერონ", — თქვა ჰანაფიმ.

"მაშინაც კი, როცა ზრდასრული ქალი მღერის და სხვა ქალი ჩაუვლის მას, ქალმა არ უნდა იმღეროს ისე, რომ მეორემ გაიგოს... როგორ უნდა მიეცეთ მათ სიმღერის უფლება, თუ მათ არ აქვთ უფლება მოისმინონ ერთმანეთის ხმები ლოცვის დროს, რომ აღარაფერი ვთქვათ სხვა რამეებზე", — ამის შესახებ მოგვიანებით The Telegraph-მა გაავრცელა მისი ნათქვამი.

ამასთან მან დასძინა, რომ ავღანეთში ქალის ხმა მიჩნეულია "სიშიშვლედ", რაც იმას ნიშნავს, რომ საზოგადოებრივ ადგილებშიც არ უნდა ისმოდეს.