კანადა საქართველოს ხელისუფლებასთან ურთიერთობას გადასინჯავს, – ამის შესახებ კანადის საგარეო საქმეთა სამინისტროს განცხადებაშია ნათქვამი, რომელიც საქართველოს საპარლამენტო არჩევნებს უკავშირდება.

განცხადებაში ნათქვამია, რომ კანადა შეშფოთებულია ამომრჩეველზე ზეწოლით, მოსყიდვითა და სხვა დარღვევებით, რომლებზეც ეუთოს დემოკრატიული ინსტიტუტებისა და ადამიანის უფლებების ოფისი და სხვა მიუკერძოებელი დამკვირვებლები იუწყებიან.

კანადის საგარეო საქმეთა სამინისტროს განცხადებას რადიო თავისუფლების თარგმანით სრულად გთავაზობთ:

"როგორც საქართველოს მეგობარი, პარტნიორი და მხარდამჭერი ხანგრძლივი დროის განმავლობაში, კანადა აღრიცხავს 2024 წლის 26 ოქტომბრის საპარლამენტო არჩევნების ოფიციალურ შედეგებს, რომელიც ქვეყნის ცენტრალურმა საარჩევნო კომისიამ გამოაცხადა.

მაგრამ კანადა შეშფოთებულია ამომრჩეველზე ზეწოლის, ამომრჩეველთა მოსყიდვის და საარჩევნო დღის სხვა დარღვევების ფართოდ გავრცელებული ფაქტებით, რომლებზეც იუწყებიან ეუთოს დემოკრატიული ინსტიტუტებისა და ადამიანის უფლებების ოფისი (ODIHR) და სხვა მიუკერძოებელი დამკვირვებლები. ამ [ცნობებს] ყურადღება უნდა მიექცეს და გამოძიებულ უნდა იქნას. კანადას მყარად სწამს რომ თავისუფალი, სამართლიანი და დამოუკიდებელი არჩევნები დემოკრატიული საზოგადოების ქვაკუთხედია.

დიდ შვიდეულთან და ევროპელ პარტნიორებთან კოორდინირებით და არჩევნების ჩატარების და შედეგების გათვალისწინებით, კანადა გადასინჯავს მის ურთიერთობას საქართველოს ხელისუფლებასთან. კანადა ღია რჩება საქართველოსთან თანამშრომლობისთვის, თუკი საქართველოს ხელისუფლება პატივს სცემს დემოკრატიას, ადამიანის უფლებებს, კანონის უზენაესობას და ყურადღებას მიაქცევს ბოლო პერიოდში დემოკრატიის უკუსვლას.

ჩვენ ყველა მხარეს სიმშვიდისკენ მოვუწოდებთ, საქართველოს ხელისუფლებას მოვუწოდებთ პატივი სცეს ინდივიდთა უფლებებს და უსაფრთხოებას, მშვიდობიანი პროტესტის კონტექსტში.

ქართველებს ვაქებთ აქტიური მონაწილეობისთვის საარჩევნო პროცესში, მათ შორის ამომრჩევლების, საარჩევნო თანამშრომლების და მოქალაქე დამკვირვებლების რანგში", — ნათქვამია განცხადებაში.