აშშ-ის ხაზინის მდივნის ჯანეტ იელენის ინფორმაციით, შეერთებული შტატები მომავალ კვირას ახალი სანქციების გამოცხადებას აპირებს. სანქციების მიზანია უკრაინის მხარდაჭერა რუსეთის მიერ განხორციელებული აგრესიის პირობებში. ინფორმაციას ამის შესახებ რადიო თავისუფალება — ევროპა ავრცელებს.

როგორც ჯანეტ იელენმა საერთაშორისო მონეტარული ფონდისა და მსოფლიო ბანკის შეხვედრაზე განაცხადა, სანქციები გამიზნული იქნება მეორადი სუბიექტებისთვის იმ ქვეყნებში, რომლებიც რუსეთს სამხედრო საჭიროებების დაკმაყოფილებაში ხელს უწყობენ.

"ჩვენ გამოვავლენთ ახალ ძლიერ სანქციებს მათთვის, ვინც ხელს უწყობს კრემლის საომარ მანქანას, მათ შორის, შუამავლებს მესამე ქვეყნებში, რომლებიც რუსეთს აწვდიან საჭირო რესურსებს მისი სამხედროებისთვის", — თქვა მან პრესკონფერენციის გახსნისას.

იელენი ასევე შეეხო რუსეთის გაყინული აქტივებს და აღნიშნა, რომ მიმდინარეობს დაუღალავი მუშაობა ამ რესურსის უკრაინის დასახმარებლად გამოყენების კუთხით. როგორც მან აღნიშნა, ევროპარლამენტმა დაამტკიცა 35 მილიარდ ევრომდე სესხი უკრაინის თავდაცვისა და რეკონსტრუქციისთვის, რომელიც დაფარული იქნება რუსეთის ცენტრალური ბანკის აქტივებიდან საზღვარგარეთ გაყინული შემოსავლების გამოყენებით.

აშშ-ს ხაზინის მდივნის ინფორმაციით, დიდი შვიდეული და ევროკავშირი ინტენსიურად მუშაობენ უკრაინისთვის 50 მილიარდი დოლარის საერთო სასესხო პაკეტზე, რომელიც გაყინული რუსული აქტივებით იქნება უზრუნველყოფილი.

"აშშ-ის ფინანსთა სამინისტრო "დაუღალავად მუშაობს რუსეთის გაყინული სუვერენული აქტივების ეკონომიკური ღირებულების გასახსნელად უკრაინის დასახმარებლად", — თქვა იელენმა.