სტეფანწმინდა-ლარსის მაგისტრალის სტეფანწმინდა-გველეთის 4.5-კილომეტრიანი მონაკვეთის მშენებლობის ხელშეკრულება გაფორმდა - ამის შესახებ საავტომობილო გზების დეპარტამენტის მიერ გამოქვეყნებული ხელშეკრულებიდან ირკვევა. ცნობის თანახმად, საერთაშორისო ტენდერში გამარჯვებულია China Railway Tunnel Group Co რომელიც პროექტს 212,548,323 ლარად ააშენებს, რაც გზის სატენდერო სავარაუდო ღირებულებაზე 12.5 მილიონი ლარით ნაკლებია. ამავე კომპანიამ შეასრულა ქვეშეთი-კობის 9-კილომეტრიანი გვირაბის სამშენებლო სამუშაოები, რომლის ღირებულებაც 900 მილიონ ლარს შეადგენდა.

საქართველოს მთავრობა რუსეთის საზღვრამდე მიმავალი ავტომაგისტრალის მოდერნიზაციას გეგმავს - ამისთვის 2024 წლის მარტში გზების დეპარტამენტმა 225 მილიონი ლარის ღირებულების ტენდერი გამოაცხადა. ორზოლიანი გზის პროექტი ურთულეს გეოგრაფიულ არეალში გაივლის და მგზავრობის დროს მკვეთრად შეამცირებს. მისი სიგრძე 4.5 კილომეტრი იქნება.

პროექტზე წინა ტენდერი ჯერ კიდევ გასული წლის ივნისში 246 მილიონი ლარის სავარაუდო ღირებულებით გამოქვეყნდა, თუმცა ის მიმდინარე წლის დასაწყისში შეწყდა, რის შემდეგაც გზების დეპარტამენტმა განახლებული ტენდერი გამოაქვეყნა.

სატენდერო დოკუმენტაციის თანახმად, ამ გზის ფარგლებში ორი ესტაკადა და ორი გვირაბი აშენდება, მათი პარამეტრები ასეთი იქნება:

• ესტაკადა N1 მდ.თერგზე - სიგრძე 2018 მეტრი;
• ესტაკადა N2 - სიგრძე 636 მეტრი;
• გვირაბი N1 - სიგრძე 460 მეტრი;
• გვირაბი N2 - სიგრძე 846 მეტრი.

მთლიანობაში გვირაბებსა და ესტაკადაზე დაგეგმილი საპროექტო მანძილის 88% მოდის, სწორედ ამის გამო, ერთი კილომეტრის აშენება ბიუჯეტს 47 მილიონი ლარი დაუჯდება, რაც გზის ყოველ მეტრზე 47,232 ლარს შეადგენს.

გზის საპროექტო პარამეტრები ასეთი იქნება:

• საანგარიშო საპროექტო სიჩქარე - 60 კმ/სთ;
• მიწის ვაკისის სიგანე – 14.0 მ;
• სავალი ნაწილის სიგანე – 7.0 მ;
• სამოძრაო ზოლის სიგანე – 3.5 მ;
• სამოძრაო ზოლების რაოდენობა - 2.

"საპროექტო გზის მონაკვეთი მდებარეობს მცხეთა-მთიანეთის რეგიონის, ყაზბეგის მუნიციპალიტეტის ტერიტორიის ფარგლებში. გზა გადის პრაქტიკულად დაუსახლებელ ტერიტორიაზე. საპროექტო მონაკვეთის მთლიანი სიგრძე შეადგენს 4.5 კმ-ს. სტეფანწმინდა-გველეთის მონაკვეთი არის არშა-სტეფანწმინდის შემოვლითი გზის მონაკვეთის გაგრძელება. მიმართულების გარკვეული ნაწილი მდინარე თერგის კალაპოტის მარცხენა ნაპირზე, სანაპირო ზოლში გადის. საპროექტო მონაკვეთი გადის ძალიან რთულ რელიეფში, მდინარე თერგის ვიწრო ხეობაში, რომელიც ორივე მხრიდან შემოსაზღვრულია მთებით", – ნათქვამია სატენდერო პირობებში.